അഹമ്മദാബാദ് : ഗുജറാത്ത് സ്റ്റേറ്റ് റോഡ് ട്രാൻസ്പോർട്ട് കോർപ്പറേഷൻ ആധുനിക ശൈലിയിലുള്ള നൂതന ബസ്സുകൾ നിരത്തിലിറക്കാനുള്ള പദ്ധതിയിലാണ്. അശോക് ലെയ്‌ലാൻഡിനാണ് പുതിയ ബസുകൾക്കുള്ള ഓർഡർ നൽകിയിരിക്കുന്നത്. പൂർണ്ണമായും നിർമ്മിക്കപ്പെട്ട ബസ്സുകളാണ് ഓർഡർ ചെയ്തിട്ടുള്ളത്. 1,282 ബസുകളാണ് അശോക് ലെയ്ലാൻഡിൽ നിന്നും ഗുജറാത്ത് സർക്കാർ വാങ്ങുന്നത്.
55 സീറ്റുകളുള്ള പൂർണ്ണമായി അസംബിൾ ചെയ്ത ബിഎസ് VI ഡീസൽ ബസുകളാണ് ഗുജറാത്തിനായി അശോക് ലെയ്ലാൻഡ് നിർമിക്കുന്നത്. ഈ ബസ്സുകൾ ഘട്ടം ഘട്ടമായി വിതരണം ചെയ്യാനാണ് കമ്പനി തീരുമാനിച്ചിരിക്കുന്നത്. ഇതിനുമുമ്പും ഗുജറാത്ത് സർക്കാരിൽ നിന്നും അശോക് ലെയ്ലാൻഡിന് നൂതന ബസുകൾക്കുള്ള ഓർഡറുകൾ ലഭിച്ചിട്ടുണ്ട്. ഈ പുതിയ ഓർഡർ കൂടി ചേർത്താൽ ഇതുവരെയായി 4000 ബസുകളാണ് ഗുജറാത്ത് സ്റ്റേറ്റ് റോഡ് ട്രാൻസ്പോർട്ട് കോർപ്പറേഷൻ അശോക് ലെയ്ലാൻഡിൽ നിന്നും വാങ്ങുന്നത്.
അശോക് ലെയ്ലാന്റിന്റെ ഇൻ-ഹൗസ് വികസിപ്പിച്ച iGen6 BS VI OBD II സാങ്കേതികവിദ്യ അനുസരിച്ച് നിർമ്മിക്കുന്ന ബസ്സുകൾ ആണ് ഗുജറാത്ത് സർക്കാരിന് നൽകുന്നത്. ഉയർന്ന നിലവാരവും കരുത്തും കാര്യക്ഷമതയും വാഗ്ദാനം ചെയ്യുന്നതാണ് ഈ നിർമ്മാണ സാങ്കേതിക വിദ്യ. ഗുജറാത്തിന്റെ ഈ വമ്പൻ ഓർഡറിന്റെ വിവരം പുറത്തുവന്നതോടെ അശോക് ലെയ്ലാൻഡിന്റെ ഓഹരികൾ 1.6 ശതമാനം ഉയർച്ച കൈവരിച്ചതായാണ് റിപ്പോർട്ടുകൾ സൂചിപ്പിക്കുന്നത്.
