“ഈശ്വരന്റെ അനുഗ്രഹം, ദേവി തന്നെ തിരഞ്ഞെടുത്തു”; തൃശ്ശൂരില്‍ നാരി പൂജയില്‍ പങ്കെടുത്ത് നടി ഖുശ്ബു; കാണാം ചിത്രങ്ങള്‍

തൃശൂര്‍: പെരിങ്ങോട്ടുകര വിഷ്ണുമായ ക്ഷേത്രത്തിലെ നാരീപൂജയില്‍ പങ്കെടുത്ത് നടിയും വനിതാ കമ്മീഷന്‍ അംഗവുമായ ഖുശ്ബു സുന്ദര്‍. ഒക്ടോബര്‍ ഒന്നാം തീയതിയാണ് ക്ഷേത്രത്തില്‍ വച്ച് പൂജ നടന്നത്. സ്ത്രീകളെ ദേവിയായി സങ്കല്‍പിച്ച് പൂജിക്കുന്ന അപൂര്‍വം ക്ഷേത്രങ്ങളില്‍ ഒന്നാണ് ദേവസ്ഥാനം വിഷ്ണുമായ സ്വാമി ക്ഷേത്രം. ദേവ സ്ഥാനപതി ഉണ്ണി ദാമോദരന്റെ മുഖ്യ കാര്‍മികത്വത്തിലായിരുന്നു പൂജ.

തിരഞ്ഞെടുക്കപ്പെടുന്ന സ്ത്രീയെ പീഠത്തിലിരുത്തി പഞ്ച ഉപചാരങ്ങളോടെ മഹാദേവിയായി സങ്കല്‍പ്പിച്ചാണ് പൂജ നടത്തുക. ലോകത്തിലെ മുഴുവന്‍ സ്ത്രീകളേയും ജഗദീശ്വരിയുടെ അംശമായി കണ്ട് ആദരിക്കുന്ന പൂജയാണിത്. ഖുശ്ബുവിന്റെ പാദം കഴുകിയാണ് പൂജ തുടങ്ങിയത്. ജലം, ചന്ദനം, കുങ്കുമം, അക്ഷത പുഷ്പം എന്നിവ കൊണ്ട് പഞ്ച ഉപചാരങ്ങളോട് മഹാദേവി സങ്കല്‍പ്പത്തിലുള്ള പൂജയാണ് പെരിങ്ങോട്ടുകര ദേവിസ്ഥാനത്ത് നടന്നത്.

‘ഈശ്വരനില്‍ നിന്നുള്ള ദിവ്യ അനുഗ്രഹം! തൃശ്ശൂരിലെ വിഷ്ണുമായ ക്ഷേത്രത്തില്‍ നിന്ന് നാരീപൂജയ്ക്കായി തന്നെ ക്ഷണിച്ചത് ഭാഗ്യമായി കരുതുന്നു. തിരഞ്ഞെടുക്കപ്പെട്ടവരെ മാത്രമേ അവര്‍ ക്ഷണിക്കൂ. ദേവി തന്നെയാണ് വ്യക്തിയെ തിരഞ്ഞെടുക്കുന്നതെന്നാണ് അവര്‍ വിശ്വസിക്കുന്നത്. ഇത്തരമൊരു ബഹുമതി നല്‍കി എന്നെ അനുഗ്രഹിച്ചതിന് ക്ഷേത്രത്തിലെ എല്ലാവര്‍ക്കും എന്റെ നന്ദി’, ഖുശ്ബു തന്റെ എക്‌സ് അക്കൗണ്ടില്‍ കുറിച്ചു.

ദിവസവും പ്രാര്‍ത്ഥിക്കുകയും നമ്മെ സംരക്ഷിക്കാന്‍ ഒരു ശക്തിയുണ്ടെന്ന് വിശ്വസിക്കുകയും ചെയ്യുന്ന എല്ലാവര്‍ക്കും ഈശ്വരന്‍ കൂടുതല്‍ നല്ല കാര്യങ്ങള്‍ നല്‍കുമെന്ന് എനിക്ക് ഉറപ്പുണ്ട്. എന്റെ പ്രിയപ്പെട്ടവര്‍ക്കും ലോകത്തിനും മെച്ചപ്പെട്ടതും സന്തോഷകരവും സമാധാനപരവുമായ കാര്യങ്ങളുണ്ടാകാന്‍ പ്രാര്‍ത്ഥിക്കുന്നുവെന്നും ഖുശ്ബു കൂട്ടിച്ചേര്‍ത്തു. പൂജയുടെ ചിത്രങ്ങളും ഖുശ്ബു പങ്ക് വച്ചിട്ടുണ്ട്.

Divine blessing from the God!
Feel so lucky to have been invited by #VishnumayaTemple in Thrissur to do #NaariPooja . Only chosen ones are invited. They believe the Goddess herself chooses the person. My humble gratitude to everyone at the temple for blessing me with such an… pic.twitter.com/k1F9596Vgk

— KhushbuSundar (Modi ka Parivaar) (@khushsundar) October 3, 2023

പൂര്‍ണ്ണ കുംഭം നല്‍കിയാണു ഖുശ്ബുവിനെ ക്ഷേത്ര ഭാരവാഹികള്‍ സ്വീകരിച്ചത്. പൂജയ്ക്ക് ശേഷം ദേവസ്ഥാനാധിപതി ഖുശ്ബുവിന് പൂജിച്ച പഴങ്ങള്‍ നല്‍കി. തുടര്‍ന്ന് കളംപാട്ട് ഉത്സവത്തിന്റെ ഭാഗമായുള്ള മഹാപൂക്കളവും നടന്നു.

ബാലതാരമായി സിനിമയിലെത്തിയ ഖുശ്ബു മലയാളം ഉള്‍പ്പെടെ തെന്നിന്ത്യന്‍ ഭാഷകളില്‍ മികച്ച വേഷങ്ങള്‍ ചെയ്തിട്ടുണ്ട്. നിലവില്‍ ദേശീയ വനിതാ കമ്മീഷന്‍ അംഗമാണ് താരം.