തിരുവനന്തപുരം: വിവിധ പ്രൊഫഷണൽ ഡിപ്ലോമ കോഴ്സുകളിലേക്കുള്ള അഡ്മിഷന്റെ ഭാഗമായി രണ്ടാം അലോട്മെന്റ് പ്രസിദ്ധീകരിച്ചു. പ്രൊഫഷണൽ ഡിപ്ലോമ ഇൻ ഫാർമസി, ഹെൽത്ത് ഇൻസ്‌പെക്ടർ, വിവിധ പാരാമെഡിക്കൽ ഡിപ്ലോമ കോഴ്സുകൾ എന്നിവയിലേക്കുള്ള രണ്ടാം ഘട്ട അലോട്മെന്റാണ് https://lbscentre.kerala.gov.in/ വെബ്‌സൈറ്റിൽ പ്രസിദ്ധീകരിച്ചത്. അലോട്മെന്റ് ലഭിച്ചവർ നവംബർ 14 നകം ഓൺലൈനായോ ഫെഡറൽ ബാങ്കിന്റെ ഏതെങ്കിലും ശാഖയിലോ ഫീസ് അടയ്‌ക്കേണ്ടതുണ്ട്.
ഫീസ് അടയ്ക്കാത്തവർക്കു തുടർന്നുള്ള അലോട്മെന്റ് നഷ്ടപ്പെടും. അതേസമയം ഫീസ് അടച്ചവർ തുടർന്നുള്ള അവരുടെ ഓപ്ഷനുകൾ പരിഗണിക്കേണ്ടതില്ലെങ്കിൽ അവ ലിസ്റ്റിൽ നിന്നും നീക്കേണ്ടതാണ്. മൂന്നാം ഘട്ട അലോട്മെന്റിലേക്കുള്ള ഓപ്ഷനുകളുടെ പുനഃക്രമീകരണത്തിനായി നവംബർ 14 വൈകീട്ട് അഞ്ചുവരെയാണ് സമയം. കൂടുതൽ വിവരങ്ങൾക്കായി 0471 2560362 , 2560363, 2560364 നമ്പറുകളിലേക്ക് ബന്ധപ്പെടാവുന്നതാണ്.
