രക്തസമ്മർദ്ദം വർദ്ധിക്കുന്നതിൽ നമ്മുടെ ജീവിതശൈലി വളരെ വലിയ പങ്കാണ് വഹിക്കുന്നത്. ആരോഗ്യകരമായ ജീവിതശൈലി പിന്തുടർന്നാൽ ഒരു പരിധിവരെ രക്തസമ്മർദ്ദത്തെ അകറ്റി നിർത്താം. അതിനായി ജീവിതശൈലിയിൽ ശ്രദ്ധിക്കേണ്ട ചില കാര്യങ്ങൾ ഇതാ.
രക്തസമ്മർദ്ദം നിയന്ത്രിക്കുന്നതിനുള്ള ഏറ്റവും ഫലപ്രദമായ ജീവിതശൈലി മാറ്റങ്ങളിലൊന്നാണ് ശരീരഭാരം കുറയ്ക്കൽ. നിങ്ങൾ അമിതവണ്ണമുള്ളവരാണെങ്കിൽ, ചെറിയ അളവിൽ പോലും ശരീരഭാരം കുറയ്ക്കുന്നത് രക്തസമ്മർദ്ദം കുറയ്ക്കാൻ സഹായിക്കും. സാധാരണയായി ഒരു കിലോഗ്രാം ഭാരം കുറയുമ്പോൾ രക്തസമ്മർദ്ദം ഏകദേശം 1 മില്ലിമീറ്റർ മെർക്കുറി വരെ കുറയും എന്നാണ് വിദഗ്ധർ പറയുന്നത്. അമിതവണ്ണത്തിൽ അരക്കെട്ടിന്റെ വലുപ്പവും പ്രധാനമാണ്. അരയിൽ അമിതഭാരം ഉണ്ടാകുന്നത് ഉയർന്ന രക്തസമ്മർദ്ദത്തിനുള്ള സാധ്യത വർദ്ധിപ്പിക്കും. പുരുഷന്മാരുടെ അരക്കെട്ടിന്റെ അളവ് 40 ഇഞ്ചിൽ (102 സെന്റീമീറ്റർ) കൂടുതലാണെങ്കിലോ,
സ്ത്രീകളുടെ അരക്കെട്ടിന്റെ അളവ് 35 ഇഞ്ചിൽ (89 സെന്റീമീറ്റർ) കൂടുതലാണെങ്കിലോ അമിത രക്തസമ്മർദ്ദം ഉണ്ടാകാനുള്ള എല്ലാ സാധ്യതയും ഉണ്ട്.
രക്തസമ്മർദ്ദം കൂടുമ്പോൾ എല്ലാവർക്കും അറിയാവുന്ന ഒരു കാര്യമാണ് സോഡിയതിന്റെ അളവ് കുറയ്ക്കുക എന്നുള്ളത്. ഉപ്പ് അധികമായുള്ള ഭക്ഷണങ്ങൾ തീർത്തും ഒഴിവാക്കുക. പതിവായി വ്യായാമം ചെയ്യുന്നത് രക്തസമ്മർദ്ദം കുറയ്ക്കാനും അകറ്റിനിർത്താനും നല്ലതാണ്. എല്ലാ ദിവസവും കുറഞ്ഞത് 30 മിനിറ്റ് മിതമായ ശാരീരിക പ്രവർത്തനങ്ങളിൽ ഏർപ്പെടുന്നവർക്ക് അമിത രക്തസമ്മർദ്ദം ഉണ്ടാകാനുള്ള സാധ്യത കുറവാണ്.
രക്തസമ്മർദ്ദത്തിന്റെ കാര്യത്തിൽ മദ്യമാണ് മറ്റൊരു പ്രധാന വില്ലൻ. മദ്യപാനം തീർച്ചയായും രക്തസമ്മർദ്ദം വർദ്ധിപ്പിക്കുന്നതാണ്. ഇനി രക്തസമ്മർദ്ദത്തിന് മരുന്നുകൾ കഴിക്കുന്നവർ ആണെങ്കിൽ കൂടുതൽ ശ്രദ്ധിക്കേണ്ടതുണ്ട്. ഇത്തരത്തിൽ മരുന്നു കഴിക്കുന്നവർ മദ്യപിക്കുന്നത് വഴി രക്തസമ്മർദ്ദത്തിന് കഴിക്കുന്ന മരുന്നിന് ഫലമില്ലാതെയാക്കുന്നതാണ്. ഈ കാര്യങ്ങളോടൊപ്പം പുകവലി ഒഴിവാക്കുക, ആവശ്യത്തിന് ഉറങ്ങുക, സമ്മർദ്ദം ഒഴിവാക്കുക എന്നീ കാര്യങ്ങളും കൂടി ശ്രദ്ധിച്ചാൽ രക്തസമ്മർദ്ദം ഉയരുന്നത് തടയാൻ സാധിക്കുന്നതാണ്.
