വാരണാസി: ജ്ഞാൻവാപി തർക്കമന്ദിരത്തിൽ പ്രാർത്ഥന നടത്തി ഹിന്ദുമതവിശ്വാസികൾ. 31 വർഷത്തിന് ശേഷമാണ് മസ്ജിദിൻ്റെ അകത്ത് പ്രാർത്ഥന നടത്തുന്നത്. നിലവറയിൽ കോടതി നിർദ്ദേശിച്ച സ്ഥലത്താണ് പുരോഹിതന്റെ കുടുംബവും ഭക്തരും പ്രാർത്ഥിച്ചത്. കാശി വിശ്വനാഥ് ട്രസ്റ്റ് നിയോഗിച്ച പുരോഹിതനാണ് ആരതി നടത്തിയത്. മസ്ജിദിൻ്റെ താഴെ തെക്കുഭാഗത്തുള്ള നിലവറകളിലാണ് പൂജ.
പൂജകൾ സുഗമമാക്കുന്നതിന് ഏഴു ദിവസത്തിനകം ക്രമീകരണങ്ങൾ ചെയ്യാൻ ജില്ലാ മജിസ്ട്രേറ്റിനോട് നിർദ്ദേശിച്ച് ജഡ്ജി എകെ വിശ്വേഷ് ഉത്തരവിട്ടിരുന്നു. ഇതനുസരിച്ചാണ് ജില്ലാഭരണകൂടം കോടതി ഉത്തരവ് പാലിക്കാനുള്ള അവസരം നൽകിയത്. മസ്ജിദ് സമുച്ചയത്തിലെ ‘വസുഖാന’ക്ക് മുന്നിലുള്ള ‘നന്ദി’ പ്രതിമയ്ക്ക് മുമ്പിലുള്ള ബാരിക്കേഡുകൾ നീക്കം ചെയ്താണ് പ്രാർത്ഥന നടത്തിയത്.
ജില്ലാ മജിസ്‌ട്രേറ്റ് (ഡിഎം) എസ് രാജലിംഗം, പോലീസ് കമ്മീഷണർ അശോക് മുത്ത ജെയിൻ, മറ്റ് ഉദ്യോഗസ്ഥർ എന്നിവരുടെ സാന്നിധ്യത്തിലായിരുന്നു ഭക്തർ ആരതി നടത്തിയത്. രാത്രി ഒമ്പത് മണിയോടെയാണ് ജില്ലാ ഉദ്യോഗസ്ഥരും കമ്മീഷണറും അകത്ത് കടന്നത്. രാത്രി 11 മണിയോടെ നന്ദിയുടെ അടിവാരത്തിന് സമീപത്തെ ബാരിക്കേഡുകൾ നീക്കുന്ന ജോലികൾ ആരംഭിച്ചു. നടപടിക്രമങ്ങൾ പൂർത്തിയാക്കി പുലർച്ചെ രണ്ട് മണിയോടെ ഉദ്യോഗസ്ഥർ പുറത്തിറങ്ങി.
ഞങ്ങൾ നന്ദിയെ കണ്ടു. ഞങ്ങൾ പ്രാർത്ഥിക്കാൻ കാത്തിരിക്കുകയായിരുന്നു. ക്ഷേത്രം പണിയണം. പ്രാർത്ഥിച്ചതിന് ശേഷം ഞങ്ങൾക്ക് വളരെ സന്തോഷമുണ്ട് , ആരാധന അർപ്പിച്ച ശേഷം സമുച്ചയത്തിന് പുറത്ത് വന്ന ഒരു ഭക്തൻ പറഞ്ഞു.
കാശി വിശ്വനാഥ ക്ഷേത്രത്തിന് സമീപം സ്ഥിതി ചെയ്യുന്ന മസ്ജിദ് ക്ഷേത്രത്തിന്റെ അവശിഷ്ടങ്ങൾ ഉപയോഗിച്ചാണോ നിർമ്മിച്ചതെന്ന് നിർണ്ണയിക്കാൻ, ആവശ്യമായ സ്ഥലങ്ങളിൽ ഉത്ഖനനം ഉൾപ്പെടെ വിശദമായ ശാസ്ത്രീയ സർവേ നടത്താൻ കഴിഞ്ഞ വർഷം ജൂലൈ 21 ന് വാരണാസി ജില്ലാ കോടതി എഎസ്‌ഐയോട് നിർദ്ദേശിച്ചിരുന്നു. ഇതനുസരിച്ച് നടത്തിയ സർവ്വേയിൽ മസ്ജിദിന് മുൻപ് അവിടെ ഹിന്ദുക്ഷേത്രം നിലനിന്നതിന്റെ വ്യാപക തെളിവുകൾ ലഭിച്ചിരുന്നു.
