അബുദാബി : സൂപ്പർസ്റ്റാർ രജനീകാന്തിന് യുഎഇ ഗോൾഡൻ വിസ നൽകി ആദരിച്ചു. അബുദാബി സർക്കാർ ആണ് രജനികാന്തിന് ഗോൾഡൻ വിസ സമർപ്പിച്ചത്. അബുദാബിയിലെ ഡിസിടി ആസ്ഥാനത്ത് വച്ച് നടന്ന ചടങ്ങിൽ അബുദാബി എക്സിക്യൂട്ടീവ് കൗൺസിൽ അംഗവും അബുദാബി ഗവൺമെന്റ് കൾച്ചർ ആൻഡ് ടൂറിസം വകുപ്പ് ചെയർമാനുമായ മുഹമ്മദ് ഖലീഫ അൽ മുബാറക്ക് ആണ് രജനീകാന്തിന് ഗോൾഡൻ വിസ കൈമാറിയത്.
മലയാളി വ്യവസായിയും ലുലു ഗ്രൂപ്പ് ചെയർമാനുമായ എം എ യൂസഫലിയും രജനീകാന്തിന് ഗോൾഡൻ വിസ സമ്മാനിക്കുന്ന ചടങ്ങിൽ പങ്കെടുത്തു. അബുദാബി സർക്കാരിനോട് ഒപ്പം തന്നെ യൂസഫലിക്കും നന്ദി അറിയിക്കുന്നതായി രജനികാന്ത് ചടങ്ങിൽ വ്യക്തമാക്കി. ചടങ്ങിനു ശേഷം രജനികാന്ത് അബുദാബി കൊട്ടാരത്തിൽ എത്തി യുഎഇ മന്ത്രിയും ക്യാബിനറ്റ് അംഗവുമായ ഷെയ്ഖ് നഹ്യാൻ ബിൻ മുബാറക്ക് അൽ നഹ്യാനെ സന്ദർശിച്ചു.
അബുദാബിയിൽ പുതുതായി നിർമ്മിച്ച ബാപ്സ് ഹിന്ദു ക്ഷേത്രവും ഷെയ്ക്ക് സായിദ് ഗ്രാൻഡ് മസ്ജിദിലും രജനീകാന്ത് സന്ദർശനം നടത്തി. കഴിഞ്ഞദിവസം രജനീകാന്ത് അബുദാബിയിലെ എം എ യൂസഫലിയുടെ വസതിയും സന്ദർശിച്ചിരുന്നു. പുതിയ ചിത്രമായ വേട്ടയന്റെ ചിത്രീകരണം പൂർത്തിയാക്കിയ ശേഷമാണ് രജനീകാന്ത് അബുദാബി സന്ദർശനത്തിന് എത്തിയിട്ടുള്ളത്.
