വീടുകളിലെ സ്ഥിരം ശല്യക്കാർ ആണ് പാറ്റകൾ. രാത്രി കാലങ്ങളിൽ വീട്ടിൽ മുഴുവനായി സൈ്വര്യവിഹാരം നടത്തുന്ന ഇവറ്റകൾ വലിയ തലവേദനയാണ് വീട്ടമ്മമാർക്ക് സൃഷ്ടിക്കാറുള്ളത്. അടുക്കള മുതൽ അലമാര വരെ എത്തുന്ന ഇവ ഭക്ഷണ സാധനങ്ങൾ തിന്നുകയും വസ്ത്രങ്ങൾ കടിച്ച് കേടുവരുത്തുകയും ചെയ്യാറുണ്ട്. അനേകമായിരം ബാക്ടീരികളെയും വഹിച്ച് നടക്കുന്ന ഇവ രോഗവ്യാപികൂടിയാണ്. പ്ലേറ്റുകളിലും പാത്രങ്ങളിലും ഇവ കാഷ്ടിക്കാറുണ്ട്. ഈ പാത്രങ്ങൾ കഴുകാതെ ഉപയോഗിച്ചാൽ മാരകമായ അസുഖങ്ങൾ ആയിരിക്കും വരിക.
ശല്യക്കാരായ പാറ്റകളെ തുരത്താൻ പല വിദ്യകളും പ്രയോഗിച്ച് തോറ്റവരാകും ഭൂരിഭാഗവും. ഇതേ തുടർന്ന് അറ്റകൈ പ്രയോഗം എന്ന രീതിയിൽ മരുന്ന് പ്രയോഗം നടത്തുന്നുണ്ടാകും. എന്നാൽ ഇത് കൊണ്ട് പാറ്റകൾ ചത്തേക്കാമെങ്കിലും അതിലെ വിഷാംശം നമ്മുടെ ആരോഗ്യത്തെയും സാരമായി ബാധിക്കാം. എന്നാൽ വീട്ടുമുറ്റത്ത് നിൽക്കുന്ന ഈ ചെടികളുടെ ഇല ഉപയോഗിച്ച് വളരെ എളുപ്പത്തിൽ തന്നെ നമുക്ക് പാറ്റകളെ തുരത്താം എന്നതാണ് വാസ്തവം.
ആര്യവേപ്പ്
എല്ലാ വീടുകളിലും സർവ്വ സാധാരണയായി കാണപ്പെടുന്ന മരമാണ് ആര്യവേപ്പ്. ഇതിന്റെ ഇല പാറ്റകളെ തുരത്താനായി ഉപയോഗിക്കാം. ആര്യവേപ്പിന്റെ ഇല തണ്ടോടുകൂടി ഉണക്കി അലമാരയ്ക്കുള്ളിൽ വയ്ക്കുകയോ അതല്ലെങ്കിൽ ഇല മാത്രമായി എടുത്ത് അത് ഉണക്കിയ ശേഷം അലമാരകൾ, അടുക്കളയിലെ പാത്രങ്ങൾ സൂക്ഷിക്കുന്ന സ്ഥലങ്ങൾ എന്നിവിടങ്ങളിൽ വിതറുകയോ ചെയ്യാം. ഇത് പാറ്റകൾ എത്തുന്നത് തടയുന്നു.
ബേ ലീഫ്
ബേ ലീഫ് അഥവാ കറുകപട്ടയുടെ ഇല ഉപയോഗിച്ചും നമുക്ക് പാറ്റകളെ തുരത്താം. ഭക്ഷണത്തിൽ ഇടാനായി വാങ്ങുന്ന ബേ ലീഫുകൾ അലമാരകളിലും പാറ്റ ശല്യമുള്ള മറ്റ് ഭാഗങ്ങളിലും നിക്ഷേപിക്കാം. ഇത് പാറ്റകളെ പെട്ടെന്ന് ഇല്ലാതാക്കാൻ സഹായിക്കുന്ന മാർഗ്ഗമാണ്.
പനിക്കൂർക്ക
പനിയെ പ്രതിരോധിക്കാൻ മാത്രമല്ല പാറ്റകളെ പ്രതിരോധിക്കാനും ഫലപ്രദമാണ് പനിക്കൂർക്ക. പാറ്റകളുടെ ശല്യം ഒഴിവാക്കാനായി രണ്ടോ മൂന്ന് പനിക്കൂർക്ക ഇല എടുത്ത ശേഷം കൈവച്ച് ഞെരിക്കുക. ശേഷം പാറ്റകളുടെ ശല്യമുള്ള ഭാഗങ്ങളിൽ ഇത് സൂക്ഷിക്കാം.
