Tsuchinshan-ATLAS എന്നറിയപ്പെടുന്ന C/2023 A3 ധൂമകേതു ഭൂമിയിലേക്ക് മടങ്ങുന്നു. ഏകദേശം 80,000 വർഷങ്ങൾക്ക് ശേഷമാണ് ധൂമകേതു ഭൂമിയിലേക്ക് എത്തുന്നത്. വാലുള്ള നക്ഷത്രത്തോട് സാമ്യമുള്ളതാണ് ഈ ധൂമകേതു . ഇവ വെള്ളിയാഴ്ച മുതൽ തിങ്കൾ വരെ ആകാശത്ത് അതിരാവിലെ കാണാൻ കഴിയും എന്നാണ് ശാസ്ത്രജ്ഞർ പറയുന്നത്.
ഇപ്പോൾ അന്താരാഷ്ട്ര ബഹിരാകാശ നിലയത്തിൽ നിലയുറപ്പിച്ചിരിക്കുന്ന നാസയുടെ ബഹിരാകാശ സഞ്ചാരി മാത്യു ഡൊമിനിക് ഇതിന്റെ മനോഹരമായ വീഡിയോ പകർത്തിയിട്ടുണ്ട്. ധൂമകേതു Tsuchinshan-ATLAS നഗ്‌നനേത്രങ്ങൾ കൊണ്ട് നോക്കുമ്പോൾ അവ്യക്തമായ നക്ഷത്രം പോലെയാണ് കാണപ്പെടുക. എന്നാൽ 1/8സെക്കന്റ് എക്‌സ്‌പോഷറിൽ 200mm f/2 ലെൻസ് ഉപയോഗിച്ച് നോക്കുകയാണെങ്കിൽ അത് വ്യക്തമായി കാണാൻ സാധിക്കും. ഈ വാൽനക്ഷത്രം സൂര്യനോട് അടുത്തുവരുമ്പോൾ വളരെ രസകരമായ ചില ചിത്രങ്ങൾ ഉണ്ടാകുന്നത് എന്ന് പറഞ്ഞ് മാത്യു ഡൊമിനിക് മനോഹരമായ ചിത്രങ്ങൾ എക്‌സിൽ പങ്കുവച്ചിട്ടുണ്ട്.
ഓരോ 80,000 വർഷത്തിലും C/2023 A3 ധൂമകേതു ഒരു ഭ്രമണപഥം പൂർത്തിയാക്കുന്നുവെന്ന് പ്രാരംഭ ഡാറ്റ സൂചിപ്പിക്കുന്നതായി ബിബിസിയുടെ ‘സ്‌കൈ അറ്റ് നൈറ്റ്’ മാഗസിൻ പറയുന്നു. 2024 സെപ്തംബർ അവസാനത്തോടെ തിളങ്ങുന്ന, സൂര്യന് തൊട്ടുമുമ്പ് ഉദിച്ചുയരുന്ന ഒരു പ്രഭാത വസ്തുവായിരിക്കും C/2023 A3 ധൂമകേതു. C/2023 A3 ധൂമകേതു സൂര്യന്റെ ഏറ്റവും അടുത്തുള്ള ബിന്ദുവായ പെരിഹെലിയനിൽ 2024 സെപ്റ്റംബർ 28ന് എത്തും. വൈകുന്നേരത്തെ ആകാശത്തേയ്ക്ക് നീങ്ങുമ്പോഴുള്ള ഈ ധൂമകേതുവിന്റെ ഏറ്റവും മികച്ച കാഴ്ചകൾ ഒക്ടോബർ 10ഓടെ ലഭിക്കുമെന്നും മാഗസിൻ സൂചിപ്പിക്കുന്നു. അപ്പോഴേക്കും അത് ചെറുതായി മങ്ങിയിരിക്കുമെങ്കിലും സൂര്യാസ്തമയത്തിന് ശേഷം പടിഞ്ഞാറ് ഭാഗത്ത് തിളക്കത്തോടെ കാണപ്പെടുമെന്നും സ്‌കൈ അറ്റ് നൈറ്റ് സൂചിപ്പിക്കുന്നു
