മുംബൈ : ബോളിവുഡ് നടൻ സൽമാൻ ഖാനു നേരെ വധഭീഷണി സന്ദേശം അയച്ച കേസിൽ നടന്റെ പുതിയ ചിത്രത്തിലെ ഗാന രചയിതാവ് അറസ്റ്റിൽ.24കാരനായ സൊഹൈൽ പാഷയാണ് അറസ്റ്റിലായത് . ബിഷ്‌ണോയ് സംഘത്തിൽനിന്നെന്ന വ്യാജേനയാണ് ഗാന രചയിതാവ് ഭീഷണി മുഴക്കിയത്. കർണാടകയിലെ റൈച്ചുരിൽനിന്നാണ് ഇയാൾ അറസ്റ്റിലായത്.
സൽമാൻ ഖാന്റെ റിലീസാകാനിരിക്കുന്ന പുതിയ ചിത്രത്തിലെ ‘മേ സിക്കന്ദർ ഹൂം’ എന്ന പാട്ടിന്റെ രചയിതാവാണ് സൊഹൈൽ. താനും തന്റെ പാട്ടും പ്രശസ്തമാകുന്നതിനു വേണ്ടിയായിരുന്നു സൊഹൈലിന്റെ നടപടിയെന്ന് പൊലീസ് പറഞ്ഞു.
നവംബർ ഏഴിനാണ് കേസിന് ആസ്പദമായ സംഭവം നടക്കുന്നത്. മുംബൈ പോലീസിന്റെ വാട്സാപ്പ് ഹെൽപ് ലൈനിൽ ഭീഷണി സന്ദേശം എത്തുകയായിരുന്നു. 5 കോടി രൂപ നൽകിയില്ലെങ്കിൽ ബിഷ്‌ണോയിയെക്കുറിച്ച് പരാമർശമുള്ള മേ സിക്കന്ദർ ഹൂം പാട്ടിന്റെ എഴുത്തുകാരനെ വധിക്കുമെന്നായിരുന്നു സന്ദേശം. തുടർന്നുള്ള അന്വേഷണത്തിലാണ് റൈച്ചൂരിലുള്ള വെങ്കടേഷ് നാരായൺ എന്നയാളിന്റെ ഫോണിൽ നിന്നാണ് സന്ദേശം വന്നതെന്ന് കണ്ടെത്തിയത്.
എന്നാൽ ഫോണിൽ ഇന്റർനെറ്റ് കണക്ഷൻ ഉണ്ടായിരുന്നില്ല. എന്നാൽ വാട്‌സ്ആപ്പ് ഇൻസ്റ്റാൾ ചെയ്യുന്നതിനുള്ള ഒടിപി നമ്പർ വന്നത് ശ്രദ്ധിച്ച പോലീസ് കൂടുതൽ ചോദ്യം ചെയതപ്പോഴാണ് മാർക്കറ്റിൽ വച്ച് ഒരു അപരിചിതൻ കോൾ ചെയ്യാൻ തന്റെ ഫോൺ വാങ്ങിയിരുന്ന കാര്യം അദ്ദേഹം പറഞ്ഞത്. പിന്നീടുള്ള അന്വേഷണം സൊഹൈൽ പക്കലേക്ക് എത്തുകയായിരുന്നു,.
