ഒട്ടാവ : ദേശീയ സുരക്ഷ, നിയമ നിർവ്വഹണം, സൈബർ സുരക്ഷ എന്നിവയിൽ സഹകരണം ശക്തിപ്പെടുത്താൻ ഇന്ത്യയും കാനഡയും തമ്മിൽ ധാരണയിൽ എത്തി. ദേശീയ സുരക്ഷാ ഉപദേഷ്ടാവ് അജിത് ഡോവലിന്റെ കാനഡ സന്ദർശന വേളയിലാണ് സുരക്ഷാ വിഷയങ്ങളിൽ ഉഭയകക്ഷി സഹകരണം ശക്തമാക്കാൻ ഇരു രാജ്യങ്ങളും തീരുമാനിച്ചത്. ഒട്ടാവയിൽ എത്തിയ അജിത് ഡോവൽ കാനഡയുടെ ദേശീയ സുരക്ഷാ, ഇന്റലിജന്‍സ് ഉപദേഷ്ടാവും പ്രധാനമന്ത്രിയുടെ ഡെപ്യൂട്ടി ക്ലര്‍ക്കും ആയ നതാലി ഡ്രൂയിനുമായി കൂടിക്കാഴ്ച നടത്തിയതിന് ശേഷമാണ് സുരക്ഷാസഹകരണം പ്രഖ്യാപിച്ചത്.
ഇരു രാജ്യങ്ങളുടെയും പൗരന്മാരുടെയും സുരക്ഷയെ പിന്തുണയ്ക്കുന്നതിനുള്ള സംരംഭങ്ങളിലെ പുരോഗതി ഇരുപക്ഷവും അംഗീകരിച്ചതായി ഇന്ത്യൻ വിദേശകാര്യ മന്ത്രാലയം അറിയിച്ചു. ഈ സുപ്രധാന നടപടി ഉഭയകക്ഷി ആശയവിനിമയങ്ങൾ കാര്യക്ഷമമാക്കാനും കാനഡയ്ക്കും ഇന്ത്യയ്ക്കും പരസ്പര ആശങ്കയുള്ള വിഷയങ്ങളിൽ സമയബന്ധിതമായ വിവരങ്ങൾ പങ്കിടൽ സാധ്യമാക്കാനും സഹായിക്കുന്നതാണ്. 2023-ൽ ഖാലിസ്ഥാൻ വിഘടനവാദി നിജ്ജാറിന്റെ കൊലപാതകത്തെത്തുടർന്നുണ്ടായ നയതന്ത്ര തർക്കത്തെത്തുടർന്ന് കടുത്ത സമ്മർദ്ദത്തിലായ ബന്ധം സാധാരണ നിലയിലാക്കാനുള്ള ഇരു രാജ്യങ്ങളുടെയും ശ്രമങ്ങളുടെ ഭാഗമായാണ് ഈ പുതിയ നീക്കം.
