ലോകത്തിലെ ഏറ്റവും വിലപിടിപ്പുള്ള ലക്ഷ്വറി ബ്രാൻഡുകളിൽ ഒന്നായ ലൂയി വിറ്റണിന്റെ (Louis Vuitton) വിശ്വപ്രസിദ്ധമായ ‘മോണോഗ്രാം’ ഡിസൈനിന് ഭാരതീയ ബന്ധമെന്ന് അവകാശവാദം. ബ്രാൻഡിന്റെ അടയാളമായ നാല് ഇതളുകളുള്ള പൂവിന്റെ ഡിസൈൻ കർണാടകയിലെ പന്ത്രണ്ടാം നൂറ്റാണ്ടിലെ ക്ഷേത്രകലയിൽ നിന്ന് പ്രചോദനം ഉൾക്കൊണ്ടതാണെന്നാണ് ഓസ്‌ട്രേലിയൻ ട്രാവൽ ഇൻഫ്ലുവൻസറായ ലിയാം റിച്ചാർഡ്‌സ് പറയുന്നത്. കർണാടകയിലെ ഹാസൻ ജില്ലയിലുള്ള ബേലൂർ ചെന്നകേശവ ക്ഷേത്രം സന്ദർശിച്ച ലിയാം, അവിടുത്തെ ശില്പങ്ങളിൽ ലൂയി വിറ്റൺ ബ്രാൻഡിന് സമാനമായ ഡിസൈനുകൾ കണ്ടെത്തിയതോടെയാണ് ഈ ചർച്ചകൾ സോഷ്യൽ മീഡിയയിൽ പടർന്നത്.
ഹൊയ്‌സാല രാജാവായിരുന്ന വിഷ്ണുവർദ്ധനൻ പണികഴിപ്പിച്ച ചെന്നകേശവ ക്ഷേത്രത്തിലെ അസാമാന്യമായ കൊത്തുപണികൾ കണ്ടാണ് ലിയാം അത്ഭുതപ്പെട്ടത്. 103 വർഷം കൊണ്ട് നിർമ്മാണം പൂർത്തിയാക്കിയ ഈ ക്ഷേത്രത്തിലെ ശില്പങ്ങളിൽ ധരിച്ചിരിക്കുന്ന ബെൽറ്റുകൾക്ക് ലൂയി വിറ്റൺ ബെൽറ്റുകളോട് അമ്പരപ്പിക്കുന്ന സാമ്യമുണ്ടെന്ന് അദ്ദേഹം ചൂണ്ടിക്കാട്ടുന്നു. “ഇവിടെ നോക്കൂ, ഇത് ലൂയി വിറ്റണിന്റെ അതേ ഡിസൈനാണ്. ഇവിടെ നിന്നാകാം അവർ ഈ ആശയങ്ങൾ മോഷ്ടിച്ചത്” എന്ന് ലിയാം തന്റെ വീഡിയോയിൽ പറയുന്നു. ശില്പങ്ങളുടെ ആഭരണങ്ങളിലും വസ്ത്രങ്ങളിലും കാണുന്ന ജ്യാമിതീയ രൂപങ്ങളും നാല് ഇതളുകളുള്ള പൂക്കളും ലൂയി വിറ്റണിന്റെ ഐക്കോണിക് ചിഹ്നങ്ങളുമായി കൃത്യമായി ഒത്തുപോകുന്നതാണ് ലോകത്തെ ഞെട്ടിക്കുന്നത്.
എന്നാൽ ലൂയി വിറ്റൺ ബ്രാൻഡിന്റെ ഔദ്യോഗിക ചരിത്രം പറയുന്നത് മറ്റൊന്നാണ്. 1896-ൽ ലൂയി വിറ്റണിന്റെ മകൻ ജോർജ്ജ് വിറ്റൺ തന്റെ പിതാവിനോടുള്ള ആദരസൂചകമായാണ് ഈ മോണോഗ്രാം ഡിസൈൻ ചെയ്തത്. ഗോതിക് ഹെറാൾഡിക് ആർട്ടും ജാപ്പനീസ് കലയുമാണ് ഇതിന് പ്രചോദനമായതെന്നാണ് കമ്പനിയുടെ വെബ്സൈറ്റിൽ പറയുന്നത്. അതേസമയം, ലൂയി വിറ്റൺ ബ്രാൻഡിന് പണ്ടേ ഭാരതവുമായി അടുത്ത ബന്ധമുണ്ട്. കപൂർത്തലയിലെ മഹാരാജാവ് ജഗത്ജിത് സിംഗിന് മാത്രം 60 ലൂയി വിറ്റൺ പെട്ടികൾ (Trunks) ഉണ്ടായിരുന്നു. ബറോഡയിലെയും ജമ്മു കാശ്മീരിലെയും രാജാക്കന്മാരും ഈ ബ്രാൻഡിന്റെ സ്ഥിരം ഉപഭോക്താക്കളായിരുന്നു.
വിദേശ ബ്രാൻഡുകൾ ഭാരതീയ കലകളിൽ നിന്നും സംസ്കാരത്തിൽ നിന്നും ആശയങ്ങൾ കടമെടുക്കുകയും എന്നാൽ അതിന്റെ ക്രെഡിറ്റ് നൽകാതെ വൻ വിലയ്ക്ക് വിൽക്കുകയും ചെയ്യുന്നു എന്ന ആക്ഷേപം കാലങ്ങളായി നിലനിൽക്കുന്നുണ്ട്. ലിയാം റിച്ചാർഡ്‌സിന്റെ വീഡിയോ വൈറലായതോടെ, ഭാരതത്തിന്റെ പുരാതനമായ വാസ്തുവിദ്യയെയും കരകൗശല വിദ്യയെയും കുറിച്ചുള്ള ചർച്ചകൾ വീണ്ടും ആഗോളതലത്തിൽ സജീവമായിരിക്കുകയാണ്. നമ്മുടെ പൈതൃകം എത്രത്തോളം ലോകത്തെ സ്വാധീനിക്കുന്നു എന്നതിന്റെ തെളിവായി ഈ കണ്ടെത്തലിനെ പലരും വിലയിരുത്തുന്നു.
