സൺറൈസേഴ്സ് ഹൈദരാബാദിന്റെ വിദേശ താരം ഹെൻറിച്ച് ക്ലാസൻ അനുവാദമില്ലാതെ തന്റെയും കുടുംബത്തിന്റെയും വീഡിയോ പകർത്തിയ ആരാധകന് നൽകുന്ന മുന്നറിയിപ്പിന്റെ വീഡിയോ സമൂഹ മാധ്യമങ്ങളിൽ വൈറലാകുന്നു. വീഡിയോയിൽ താരത്തിന്റെ മുഖം വ്യക്തമല്ലെങ്കിലും, ശബ്ദത്തിൽ നിന്ന് ഇത് ദക്ഷിണാഫ്രിക്കൻ വിക്കറ്റ് കീപ്പർ ബാറ്ററാണെന്ന് ആരാധകർ ഉറപ്പിക്കുന്നുണ്ട്. ഫോണിൽ വീഡിയോ പകർത്തുന്നത് നിർത്തിയില്ലെങ്കിൽ വിവരമറിയുമെന്ന് ക്ലാസൻ ഭീഷണിപ്പെടുത്തുന്നത് വീഡിയോയിൽ കേൾക്കാം.
“ഇത് ചെയ്യരുത്, സോറി. ഞാൻ പറയുന്നത് വളരെ ശ്രദ്ധിച്ച് കേൾക്കുക, ഇത് ചെയ്യരുത്, ഓക്കെ,” എന്ന് ക്ലാസൻ പറയുന്നുണ്ട്. “ഞാൻ നിങ്ങളോട് വേണ്ട എന്ന് പറഞ്ഞില്ലേ. ദയവായി പോകുക,” താരം കൂട്ടിച്ചേർത്തു. ആരാധകൻ വീണ്ടും വീഡിയോ പകർത്തുകയും എസ്ആർഎച്ച് നന്നായി കളിച്ചു എന്ന് പറയുകയും ചെയ്തപ്പോൾ താരത്തിന്റെ മറുപടി ഇങ്ങനെയായിരുന്നു: “വളരെ നന്ദി, പക്ഷേ ഫോട്ടോ എടുക്കരുത്. ഞാൻ തിരിഞ്ഞുനിൽക്കുമ്പോൾ നിങ്ങളെന്റെയോ എന്റെ കുടുംബത്തിന്റെയോ ഫോട്ടോ എടുത്താൽ, ഞാൻ ഉറപ്പ് തരുന്നു, നിന്റെ സ്ഥാനം താഴെയായിരിക്കും (on the floor), ഓക്കെ.”
മുംബൈ ഇന്ത്യൻസിനെതിരായ തകർപ്പൻ പ്രകടനത്തിന് പിന്നാലെ ക്ലാസനെ പ്രശംസിച്ച് മുൻ ദക്ഷിണാഫ്രിക്കൻ ഫാസ്റ്റ് ബൗളർ ഡെയ്ൽ സ്റ്റെയിൻ രംഗത്തെത്തിയിരുന്നു. മധ്യനിരയിലാണ് ബാറ്റ് ചെയ്യാൻ ഇറങ്ങുന്നതെങ്കിലും ഓറഞ്ച് ക്യാപ്പിനായുള്ള പോരാട്ടത്തിൽ ക്ലാസൻ ഇപ്പോഴും മുൻപന്തിയിലുണ്ടെന്ന് സ്റ്റെയിൻ ചൂണ്ടിക്കാട്ടി.
ഓപ്പണർമാരായ അഭിഷേക് ശർമ്മയും ട്രാവിസ് ഹെഡും ചേർന്ന് 129 റൺസ് കൂട്ടിച്ചേർത്തതിന് പിന്നാലെയാണ് ക്ലാസൻ ക്രീസിലെത്തിയത്. വെറും 30 പന്തിൽ നിന്ന് പുറത്താകാതെ 65 റൺസാണ് താരം അടിച്ചുകൂട്ടിയത്. സലിൽ അറോറ 10 പന്തിൽ 30 റൺസുമായി പുറത്താകാതെ നിന്നതോടെ ഐപിഎൽ ചരിത്രത്തിലെ ഏറ്റവും വലിയ നാലാമത്തെ വിജയകരമായ റൺ ചേസാണ് എസ്ആർഎച്ച് സ്വന്തമാക്കിയത്. ഇത് സീസണിലെ അവരുടെ അഞ്ചാമത്തെ തുടർച്ചയായ വിജയമായിരുന്നു.
ഓപ്പണർമാർ മികച്ച തുടക്കം നൽകുന്ന ടീമിൽ, പിന്നീട് മധ്യനിരയിലിറങ്ങി ഇത്രയും മികച്ച സ്കോർ കണ്ടെത്തുന്നത് ക്ലാസന്റെ അസാമാന്യ പ്രതിഭയാണെന്ന് സ്റ്റെയിൻ ജിയോസ്റ്റാറിനോട് പറഞ്ഞു.
“ഓരോ തവണ ക്രീസിലെത്തുമ്പോഴും അദ്ദേഹം പൂർണ്ണ നിയന്ത്രണത്തിലാണെന്ന് തോന്നും. മികച്ച രീതിയിൽ പന്ത് നേരിടുന്ന ക്ലാസന്, തനിക്ക് ആവശ്യമുള്ളപ്പോൾ ഗ്രൗണ്ടിന്റെ ഏത് ഭാഗത്തേക്കും ഷോട്ട് പായിക്കാൻ കഴിയും. സ്പിന്നർക്കെതിരെ അദ്ദേഹം നേടിയ ആ റിവേഴ്സ് സിക്സ് അപാരമായിരുന്നു. മികച്ച ഹാൻഡ്-ഐ കോർഡിനേഷനും, കഴിവുകൾക്കൊപ്പം സമ്മർദ്ദഘട്ടങ്ങളെ അതിജീവിക്കാനുള്ള അദ്ദേഹത്തിന്റെ മാനസിക കരുത്തുമാണ് ഇതിലൂടെ വ്യക്തമാകുന്നത്,” സ്റ്റെയിൻ കൂട്ടിച്ചേർത്തു.
POV: meeting a foreign cricketer in India…. Dude just give him and his family some privacy for gods sake.
What a man Klaasy 🙏 cinema lo hero villain ki warning ela isthado ala ichadu 😂🔥 good man 🧡#SRH #IPL2026 pic.twitter.com/imwBT2c8wi
— Varun Velamakanti 🦅 (@CricVarunSRH) April 30, 2026
