കൊൽക്കത്ത: ബംഗാളിൽ തന്റെ വിശ്വസ്തനും തിരഞ്ഞെടുപ്പ് തന്ത്രജ്ഞനുമായ ചന്ദ്രനാഥ് രഥ് കൊല്ലപ്പെട്ട സംഭവത്തിൽ രൂക്ഷ പ്രതികരണവുമായി ബിജെപി നേതാവ് സുവേന്ദു അധികാരി. ഇതൊരു സാധാരണ കുറ്റകൃത്യമല്ലെന്നും, കൃത്യമായ പ്ലാനിംഗിലൂടെ നടപ്പിലാക്കിയ രാഷ്ട്രീയ കൊലപാതകമാണെന്നും അദ്ദേഹം ആരോപിച്ചു.
വടക്കൻ 24 പർഗാനാസിലെ മധ്യംഗ്രാമിൽ വെച്ച് അക്രമികൾ ചന്ദ്രനാഥ് രഥിനെ വെടിവെച്ചു കൊന്ന വാർത്ത പുറത്തുവന്നതിന് പിന്നാലെയാണ് സുവേന്ദു അധികാരിയുടെ പ്രതികരണം. ബിജെപിയുടെ വൻ വിജയത്തിൽ നിർണ്ണായക പങ്ക് വഹിച്ച വ്യക്തിയെ ഇല്ലാതാക്കുക വഴി രാഷ്ട്രീയ പ്രതിയോഗികൾ ഭീകരാന്തരീക്ഷം സൃഷ്ടിക്കാൻ ശ്രമിക്കുകയാണെന്ന് അദ്ദേഹം പറഞ്ഞു.
സംഭവത്തിൽ ബിജെപി പ്രവർത്തകർക്കിടയിൽ വലിയ പ്രതിഷേധം ഇരമ്പുന്ന സാഹചര്യത്തിൽ, പ്രവർത്തകർ ആത്മസംയമനം പാലിക്കണമെന്ന് സുവേന്ദു അധികാരി അഭ്യർത്ഥിച്ചു. “നമ്മുടെ പ്രിയപ്പെട്ട സഹപ്രവർത്തകനെ നമുക്ക് നഷ്ടമായിരിക്കുന്നു. ഇതൊരു തീരാനഷ്ടമാണ്. എങ്കിലും, ആരും നിയമം കയ്യിലെടുക്കരുത്. പോലീസും ഭരണകൂടവും കുറ്റവാളികളെ നിയമത്തിന് മുന്നിൽ കൊണ്ടുവരുമെന്ന് നമ്മൾ പ്രതീക്ഷിക്കുന്നു,” അദ്ദേഹം പറഞ്ഞു.
കൊലപാതകികളെ ഉടൻ പിടികൂടണമെന്നും ഇതിന് പിന്നിലെ ഗൂഢാലോചന പുറത്തുകൊണ്ടുവരണമെന്നും അദ്ദേഹം പോലീസ് അധികാരികളോട് ആവശ്യപ്പെട്ടു. തിരഞ്ഞെടുപ്പിന് ശേഷം ബംഗാളിൽ സമാധാനം ഉറപ്പാക്കാൻ സർക്കാർ ബാധ്യസ്ഥമാണെന്നും അദ്ദേഹം ഓർമ്മിപ്പിച്ചു.
നന്ദിഗ്രാമിലും ഭവാനിപൂരിലും സുവേന്ദു അധികാരി നടത്തിയ ഐതിഹാസിക വിജയങ്ങൾക്ക് പിന്നിലെ ബുദ്ധികേന്ദ്രമായിരുന്നു കൊല്ലപ്പെട്ട ചന്ദ്രനാഥ് രഥ്. പ്രിയപ്പെട്ട സഹായിയുടെ വിയോഗം സുവേന്ദുവിനും ബംഗാളിലെ ബിജെപിക്കും നികത്താനാവാത്ത നഷ്ടമാണ്.
