മനാമ : ഇറാന്റെ ഇസ്ലാമിക് റവല്യൂഷണറി ഗാർഡ് കോർപ്സിന് വേണ്ടി രാജ്യത്തിനെതിരെ ഭീകരപ്രവർത്തനങ്ങൾ ആസൂത്രണം ചെയ്ത കേസിൽ 9 പേർക്ക് ജീവപര്യന്തം തടവുശിക്ഷ വിധിച്ച് ബഹ്‌റൈൻ കോടതി. രാജ്യത്തിന്റെ സുരക്ഷയെ ബാധിക്കുന്ന അതീവ തന്ത്രപ്രധാനമായ കേന്ദ്രങ്ങളെയും സുരക്ഷാ സ്ഥാപനങ്ങളെയും കുറിച്ചുള്ള വിവരങ്ങൾ ശേഖരിച്ച് ഇറാന്റെ റവല്യൂഷണറി ഗാർഡിന് കൈമാറി എന്നതാണ് പ്രതികൾക്കെതിരെ ചുമത്തപ്പെട്ട പ്രധാന കുറ്റം. കേസിൽ ഉൾപ്പെട്ട മറ്റ് രണ്ട് പ്രതികൾക്ക് മൂന്ന് വർഷം വീതം തടവ് ശിക്ഷയും കോടതി ചുമത്തിയിട്ടുണ്ട്.
സുരക്ഷാ മുൻകരുതലിന്റെ ഭാഗമായി പ്രതികളുടെ വിശദാംശങ്ങൾ ബഹ്‌റൈൻ പൂർണ്ണമായി പുറത്തുവിട്ടിട്ടില്ല. ഈ മാസം ആദ്യം ഇറാന്റെ റവല്യൂഷണറി ഗാർഡുമായി ബന്ധമുണ്ടെന്ന് ആരോപിച്ച് 41 പേരെ ബഹ്‌റൈൻ ആഭ്യന്തര മന്ത്രാലയം അറസ്റ്റ് ചെയ്തിരുന്നു. ബഹ്‌റൈനിലെ ഷിയാ ഭൂരിപക്ഷമുള്ള പ്രതിപക്ഷ ഗ്രൂപ്പുകളെ ഇറാൻ സാമ്പത്തികമായും ആയുധപരമായും വിവരങ്ങൾ ചോർത്തുന്നതായാണ് ബഹ്‌റൈൻ വ്യക്തമാക്കുന്നത്.
