തൃണമൂൽ കോൺഗ്രസിൽ നിന്ന് മുൻ പശ്ചിമബംഗാൾ മുഖ്യമന്ത്രി മമത ബാനർജിയെ പുറത്താക്കി. മമത ബാനർജിയെ അധ്യക്ഷ സ്ഥാനത്തുനിന്ന് നീക്കി മുതിർന്ന എംഎൽഎ അരുപ് റോയിയെ പുതിയ ചെയർമാനായി പ്രഖ്യാപിച്ചു. ഇതിന് തൊട്ടുപിന്നാലെ മമതയുടെ അനന്തരവനും പാർട്ടിയുടെ ദേശീയ ജനറൽ സെക്രട്ടറിയുമായ അഭിഷേക് ബാനർജിയെ പാർട്ടിയിൽ നിന്ന് സസ്‌പെൻഡ് ചെയ്തതായും ഇവർ അറിയിച്ചു. പശ്ചിമ ബംഗാൾ നിയമസഭയിലെ പ്രതിപക്ഷ നേതാവ് ഋതബ്രത ബാനർജിയുടെ നേതൃത്വത്തിലാണ് മമതയ്ക്കെതിരെയുള്ള ഈ നീക്കം നടന്നിരിക്കുന്നത്.
കൊൽക്കത്തയിലെ ന്യൂ ടൌണിലുള്ള സ്വകാര്യ ഹോട്ടലിൽ വെച്ച് വിമത എംഎൽഎമാരും കൌൺസിലർമാരും വിവിധ ജില്ലകളിൽ നിന്നുള്ള ജനപ്രതിനിധികളും പങ്കെടുത്ത പ്രത്യേക സമ്മേളനത്തിലാണ് നാടകീയമായ തീരുമാനങ്ങൾ ഉണ്ടായത്. തങ്ങളാണ് ‘യഥാർത്ഥ തൃണമൂൽ കോൺഗ്രസ്’ എന്നാണ് വിമത വിഭാഗത്തിന്റെ അവകാശവാദം. പാർട്ടിയുടെ ഭരണഘടനയനുസരിച്ച് ഓരോ മൂന്ന് വർഷം കൂടുമ്പോഴും ദേശീയ വർക്കിംഗ് കമ്മിറ്റി പുനഃസംഘടിപ്പിക്കേണ്ടതുണ്ട്. എന്നാൽ 2022 ഫെബ്രുവരിക്ക് ശേഷം ഇത് നടന്നിട്ടില്ലെന്നും നിലവിലെ നേതൃത്വത്തിന് ഭരണഘടനാപരമായ യാതൊരു സാധുതയുമില്ലെന്നും ഋതബ്രത ബാനർജി വാദിച്ചു. സമ്മേളനത്തിൽ മമത ബാനർജിയുടെയും അഭിഷേക് ബാനർജിയുടെയും ചിത്രങ്ങൾ വേദിയിൽ നിന്ന് പൂർണ്ണമായും ഒഴിവാക്കിയിരുന്നു.
അരുപ് റോയിയെ ചെയർമാനായി തിരഞ്ഞെടുത്തതിനൊപ്പം ഫിർഹാദ് ഹക്കീം, അരൂപ് ബിശ്വാസ്, രതിൻ ഘോഷ്, സബീന യാസ്മിൻ എന്നിവരെ വൈസ് ചെയർമാന്മാരായും പ്രഖ്യാപിച്ചിട്ടുണ്ട്. പുതിയ നേതൃത്വത്തിലേക്ക് വരാൻ മമത ബാനർജി ആഗ്രഹിക്കുന്നുവെങ്കിൽ അവരെ ‘ചീഫ് അഡ്വൈസർ’ (മുഖ്യ ഉപദേശക) പദവിയിലേക്ക് സ്വാഗതം ചെയ്യുന്നതായും വിമതർ അറിയിച്ചു. പുതിയ കമ്മിറ്റിയുടെ വിവരങ്ങൾ കേന്ദ്ര തെരഞ്ഞെടുപ്പ് കമ്മീഷനെ ഉടൻ അറിയിക്കുമെന്നും ഇവർ വ്യക്തമാക്കിയിട്ടുണ്ട്.
അടുത്ത കാലത്ത് നടന്ന നിയമസഭാ തെരഞ്ഞെടുപ്പിലെ പരാജയത്തിന് പിന്നാലെ തൃണമൂൽ കോൺഗ്രസിൽ ആരംഭിച്ച ആഭ്യന്തര തർക്കങ്ങളാണ് ഇപ്പോൾ വൻ പിളർപ്പിലേക്ക് വഴിമാറിയിരിക്കുന്നത്. ആകെ പകുതിയിലധികം (60-ഓളം) എംഎൽഎമാരുടെയും കൊൽക്കത്ത കോർപ്പറേഷൻ ഉൾപ്പെടെയുള്ള കൌൺസിലർമാരുടെയും പിന്തുണ തങ്ങൾക്കുണ്ടെന്നാണ് വിമത പക്ഷത്തിന്റെ അവകാശവാദം. കൂടാതെ, ടിഎംസിയുടെ 28 ലോക്സഭാ എംപിമാരിൽ 20 പേരും നേരത്തെ പാർട്ടി വിട്ട് നാഷണലിസ്റ്റ് സിറ്റിസൺസ് പാർട്ടി ഓഫ് ഇന്ത്യയിൽ (NCPI) ലയിച്ചിരുന്നു. മമത ബാനർജിയുടെ രാഷ്ട്രീയ ജീവിതത്തിലെ ഏറ്റവും വലിയ വെല്ലുവിളിയായി മാറിയിരിക്കുന്ന ഈ അട്ടിമറി നീക്കത്തോടെ ബംഗാൾ രാഷ്ട്രീയം വരും ദിവസങ്ങളിൽ കൂടുതൽ പ്രക്ഷുബ്ധമാകും എന്നുറപ്പാണ്
