കുടുംബവഴക്കുകളുടെയും വിവാഹമോചന കേസുകളുടെയും പശ്ചാത്തലത്തിൽ ഭാര്യമാർ ഭർത്താക്കന്മാരുടെ തൊഴിലുടമകൾക്ക് പരാതി അയക്കുന്ന പ്രവണതയ്ക്കെതിരെ കടുത്ത ആശങ്ക പ്രകടിപ്പിച്ച് സുപ്രീം കോടതി. ഇത്തരം പരാതികൾ ഭർത്താവിന്റെ ജോലി നഷ്ടപ്പെടുന്നതിലേക്കും, തന്മൂലം ഭാര്യയ്ക്ക് ലഭിക്കേണ്ട ജീവനാംശം (Maintenance) പോലും തടസ്സപ്പെടുന്നതിലേക്കും നയിക്കുമെന്ന് പരമോന്നത കോടതി ഓർമ്മിപ്പിച്ചു. ജസ്റ്റിസ് ബി.വി. നാഗരത്ന, ജസ്റ്റിസ് ആർ. മഹാദേവൻ എന്നിവരടങ്ങിയ ബെഞ്ചാണ് ഈ നിർണ്ണായക നിരീക്ഷണം നടത്തിയത്.
അസമിൽ ഭർത്താവിന്റെ സുഹൃത്ത് തനിക്കെതിരെ നൽകിയ മാനനഷ്ടക്കേസ് ഉത്തർപ്രദേശിലെ ഗാസിയാബാദിലേക്ക് മാറ്റണമെന്ന് ആവശ്യപ്പെട്ട് ഒരു സ്ത്രീ നൽകിയ ഹർജി പരിഗണിക്കുന്നതിനിടെയാണ് സുപ്രീം കോടതിയുടെ ഈ പരാമർശം. ഗാസിയാബാദിൽ ഭർത്താവുമായി ബന്ധപ്പെട്ട മറ്റ് കേസുകൾ നിലവിലുണ്ടെന്ന് ചൂണ്ടിക്കാട്ടിയാണ് സ്ത്രീ ഹർജി സമർപ്പിച്ചത്. ഹർജി പരിഗണനയ്‌ക്കെടുത്തപ്പോൾ, ദാമ്പത്യ തർക്കങ്ങൾ ഉണ്ടാകുമ്പോൾ ഭർത്താവിന്റെ കമ്പനിക്കോ മേലധികാരികൾക്കോ കത്തെഴുതി ജോലി കളയിപ്പിക്കുന്ന പ്രവണത ഇക്കാലത്ത് വർദ്ധിച്ചുവരുന്നതായി ജസ്റ്റിസ് നാഗരത്ന നിരീക്ഷിച്ചു.
ഇത്തരം നീക്കങ്ങൾ ഒടുവിൽ പരാതിക്കാരായ സ്ത്രീകൾക്ക് തന്നെ തിരിച്ചടിയാകുമെന്ന് കോടതി വ്യക്തമാക്കി. ഭർത്താവിന് ജോലി നഷ്ടപ്പെട്ടാൽ ഭാര്യയ്ക്കോ മക്കൾക്കോ കോടതി വഴി ലഭിക്കേണ്ട ജീവനാംശം തുക നൽകാൻ അയാൾക്ക് സാധിക്കാതെ വരും. വ്യക്തിപരമായ ദാമ്പത്യ പ്രശ്നങ്ങൾ ജോലിസ്ഥലത്തേക്ക് വലിച്ചിഴക്കുന്നത് ഒഴിവാക്കണമെന്നും, നിയമപരമായ പോരാട്ടങ്ങൾ കോടതിമുറികളിൽ തന്നെ പൂർത്തിയാക്കണമെന്നും ബെഞ്ച് ഓർമ്മിപ്പിച്ചു. വ്യക്തിവൈരാഗ്യം തീർക്കാൻ തൊഴിൽദാതാക്കളെ കരുവാക്കുന്ന രീതി തടയപ്പെടേണ്ടതാണെന്ന സുപ്രീം കോടതിയുടെ വ്യക്തമായ സന്ദേശം രാജ്യത്തുടനീളമുള്ള ആയിരക്കണക്കിന് കേസുകളിൽ നിർണ്ണായകമായേക്കും.
