കൊൽക്കത്ത : ആദിവാസി വിഭാഗങ്ങളുടെ താൽപ്പര്യങ്ങൾ സംരക്ഷിക്കുന്നതിൽ മമത ബാനർജി സർക്കാർ പൂർണ്ണമായും പരാജയപ്പെട്ടതായി കംപ്ട്രോളർ ആൻഡ് ഓഡിറ്റർ ജനറലിന്റെ (CAG) റിപ്പോർട്ട്. 2017-18 മുതൽ 2021-22 വരെയുള്ള അഞ്ച് സാമ്പത്തിക വർഷങ്ങളിലെ ആദിവാസി ഭൂമി പരിപാലനത്തെക്കുറിച്ച് നടത്തിയ ഓഡിറ്റിലാണ് ഈ ഞെട്ടിക്കുന്ന വിവരങ്ങൾ പുറത്തുവന്നത്. ഈസ്റ്റേൺ കോൾഫീൽഡ്സ് ലിമിറ്റഡ് (ECL), ഭാരത് കോക്കിംഗ് കോൾ ലിമിറ്റഡ് (BCCL) തുടങ്ങിയ പൊതുമേഖലാ കൽക്കരി കമ്പനികൾക്കായി ആദിവാസികളുടെ ഭൂമി ഏറ്റെടുത്തപ്പോൾ അർഹമായ നഷ്ടപരിഹാരവും പുനരധിവാസ ആനുകൂല്യങ്ങളും ഉറപ്പാക്കുന്നതിൽ ജില്ലാ കളക്ടർമാരും റെവന്യൂ ഉദ്യോഗസ്ഥരും കാട്ടിയ നിഷ്ക്രിയത്വവും വീഴ്ചയുമാണ് പാവപ്പെട്ട ആദിവാസികൾക്ക് വൻ സാമ്പത്തിക നഷ്ടമുണ്ടാക്കിയത് എന്ന് റിപ്പോർട്ട് വ്യക്തമാക്കുന്നു.
പരിശോധിച്ച 66 ഭൂമി ഏറ്റെടുക്കൽ കേസുകളിൽ മാത്രം ആദിവാസി ഭൂവുടമകൾക്ക് ഏകദേശം 15.25 കോടി രൂപയുടെ നഷ്ടപരിഹാരക്കുറവുണ്ടായതായി സി.എ.ജി വ്യക്തമാക്കുന്നു. 17.79 കോടി രൂപ വിപണി മൂല്യം കണക്കാക്കിയ ഭൂമിക്ക് വെറും 2.55 കോടി രൂപ മാത്രമാണ് കൽക്കരി കമ്പനികൾ ആദിവാസികൾക്ക് നൽകിയത്, അതായത് വിപണി മൂല്യത്തിന്റെ 85.68 ശതമാനത്തോളം തുക കുറച്ചു നൽകി. ഇതിനുപുറമെ, 2013-ലെ ഭൂപരിഷ്കരണ നിയമപ്രകാരം നിർബന്ധമായും നൽകേണ്ട 100 ശതമാനം സോളാഷിയം തുകയായ 17.80 കോടി രൂപയോ, വാർഷിക പലിശയോ നൽകിയിട്ടില്ല. സർക്കാർ ഭൂമിക്ക് ഏക്കറിന് 19.77 ലക്ഷം മുതൽ 1.25 കോടി രൂപ വരെ വില അനുവദിച്ചപ്പോൾ, തൊട്ടടുത്തുള്ള ആദിവാസികളുടെ ഭൂമിക്ക് വെറും 2.50 ലക്ഷം മുതൽ 12.63 ലക്ഷം രൂപ വരെ മാത്രമാണ് വിലയായി നൽകിയതെന്ന വലിയ വിവേചനവും റിപ്പോർട്ട് ചൂണ്ടിക്കാണിക്കുന്നു.
ഭൂമി ഏറ്റെടുക്കലിന് മുൻപ് നടത്തേണ്ട സാമൂഹിക ആഘാത പഠനങ്ങളോ, അർഹരായവർക്ക് തൊഴിലും കൃഷിഭൂമിയും ഉറപ്പാക്കുന്ന പുനരധിവാസ പദ്ധതികളോ (RAP) കൃത്യമായി നടപ്പിലാക്കിയിട്ടില്ല. കൂടാതെ, ഇടനിലക്കാർ വഴി ആദിവാസികളുടെ ഭൂമി തുച്ഛമായ തുകയ്ക്ക് തട്ടിയെടുക്കുന്നതിനും, നിയമപരമായ പരിധികൾ ലംഘിച്ച് ഭൂമി സ്വകാര്യ കമ്പനികളുടെ കൈകളിലേക്ക് എത്തുന്നതിനും സംസ്ഥാന റെവന്യൂ സംവിധാനം നിശബ്ദ അനുമതി നൽകിയതായി ആരോപണമുണ്ട്. വനാവകാശ നിയമപ്രകാരമുള്ള ആദിവാസികളുടെ അപേക്ഷകൾ തള്ളിക്കളഞ്ഞതിലും, ടോട്ടോ, ബിർഹോർ തുടങ്ങിയ പ്രത്യേക പാർശ്വവൽക്കരിക്കപ്പെട്ട ആദിവാസി സമൂഹങ്ങൾക്ക് (PVTGs) താമസാവകാശം നൽകുന്നതിലും സർക്കാർ വീഴ്ച വരുത്തി. ഇനിമുതൽ കൽക്കരി കമ്പനികൾ നടത്തുന്ന ഭൂമി ഏറ്റെടുക്കലുകളിൽ ജില്ലാ ഭരണകൂടം നേരിട്ട് ഇടപെടണമെന്നും, ബാധിക്കപ്പെടുന്ന ആദിവാസികളുടെ കൃത്യമായ പുനരധിവാസം ഉറപ്പാക്കാൻ മോണിറ്ററിംഗ് സമിതികൾ രൂപീകരിക്കണമെന്നും സി.എ.ജി നിർദ്ദേശിച്ചു.
