മനുഷ്യശരീരത്തിലെ ഏറ്റവും പ്രധാനപ്പെട്ട അവയവങ്ങളിലൊന്നായ വൃക്കകളുടെ പ്രവർത്തനം തകരാറിലാകുന്നത് പലപ്പോഴും പ്രാരംഭ ഘട്ടത്തിൽ വ്യക്തമായ ലക്ഷണങ്ങളോടെ ആയിരിക്കില്ല പ്രകടമാകുന്നത്. രോഗം ഗുരുതരമാകുന്നതുവരെ ലക്ഷണങ്ങൾ വളരെ സൂക്ഷ്മമായി തുടരുന്നതിനാൽ പലരും ഇത് തിരിച്ചറിയാൻ വൈകുന്നു. എന്നാൽ ശരീരം പ്രകടിപ്പിക്കുന്ന ചെറിയ ചില മാറ്റങ്ങൾ ശ്രദ്ധിച്ചാൽ വൃക്കരോഗങ്ങൾ തുടക്കത്തിലേ കണ്ടെത്താനും ചികിത്സ തേടാനും സാധിക്കും.മൂത്രവിസർജ്ജനത്തിലുണ്ടാകുന്ന വ്യതിയാനങ്ങളാണ് വൃക്കരോഗത്തിന്റെ ഏറ്റവും പ്രധാനപ്പെട്ട മുന്നറിയിപ്പുകളിലൊന്ന്.
മൂത്രമൊഴിക്കുന്നതിന്റെ അളവിലോ എണ്ണത്തിലോ പെട്ടെന്ന് മാറ്റം വരിക, പ്രത്യേകിച്ച് രാത്രികാലങ്ങളിൽ കൂടുതൽ തവണ മൂത്രമൊഴിക്കേണ്ട അവസ്ഥയുണ്ടാകുക എന്നിവ ശ്രദ്ധിക്കേണ്ടതാണ്. മൂത്രത്തിൽ അമിതമായി പതയോ കുമിളകളോ അടിഞ്ഞുകൂടുന്നത് പ്രോട്ടീൻ ചോർച്ചയുടെ ലക്ഷണമാകാം. കൂടാതെ മൂത്രത്തിന്റെ നിറം ചുവപ്പ്, പിങ്ക് അല്ലെങ്കിൽ തവിട്ട് നിറമായി മാറുന്നത് മൂത്രത്തിലൂടെ രക്തം പുറന്തള്ളപ്പെടുന്നതിന്റെ സൂചനയാണ്.വൃക്കകൾക്ക് ശരീരത്തിലെ അധിക ദ്രാവകങ്ങൾ പുറന്തള്ളാൻ കഴിയാതെ വരുമ്പോൾ മുഖം, കൺപോളകൾ, കൈകാലുകൾ, കണങ്കാൽ എന്നിവിടങ്ങളിൽ നീർവീക്കം അനുഭവപ്പെടുന്നു.
രക്തത്തിൽ വിഷാംശങ്ങളും മാലിന്യങ്ങളും അടിഞ്ഞുകൂടുന്നതും ആവശ്യത്തിന് ചുവന്ന രക്താണുക്കൾ ഉൽപ്പാദിപ്പിക്കപ്പെടാതെ വിളർച്ച ഉണ്ടാകുന്നതും കടുത്ത ബലഹീനതയ്ക്കും അമിത ക്ഷീണത്തിനും ഇടയാക്കുന്നു. ശരീരത്തിൽ അധിക ദ്രാവകം ശ്വാസകോശത്തിൽ അടിഞ്ഞുകൂടുകയോ വിളർച്ച കഠിനമാവുകയോ ചെയ്യുമ്പോൾ ശ്വാസമെടുക്കാൻ ബുദ്ധിമുട്ട് നേരിടാം. രക്തത്തിലെ ധാതുക്കളുടെ അസന്തുലിതാവസ്ഥയും മാലിന്യങ്ങളുടെ ആധിക്യവും മൂലം ചർമ്മം അമിതമായി വരണ്ടുപോകാനും ശരീരമാസകലം കടുത്ത ചൊറിച്ചിൽ ഉണ്ടാകാനും സാധ്യതയുണ്ട്.
ഭക്ഷണത്തോട് താല്പര്യമില്ലായ്മ, വായിൽ ലോഹരുചി അനുഭവപ്പെടുക, വിട്ടുമാറാത്ത ഓക്കാനവും ഛർദ്ദിയും എന്നിവയും ഇതിന്റെ ഭാഗമായി വരാം. രക്തത്തിലെ കാൽസ്യം, പൊട്ടാസ്യം എന്നിവയുടെ അളവിലുണ്ടാകുന്ന വ്യതിയാനം കാരണം രാത്രികാലങ്ങളിൽ പേശിവലിവും മസിൽ വേദനയും സാധാരണമാണ്. മാലിന്യങ്ങൾ കൃത്യമായി പുറന്തള്ളപ്പെടാത്തത് ഉറക്കമില്ലായ്മയ്ക്കും കാരണമാകുന്നു. ഇത്തരം ശാരീരിക മാറ്റങ്ങൾ അനുഭവപ്പെട്ടാൽ ഒട്ടും വൈകാതെ വിദഗ്ദ്ധ വൈദ്യസഹായവും പരിശോധനകളും തേടേണ്ടതാണ്
