ഏകദിന ക്രിക്കറ്റ് ചരിത്രത്തിൽ 1996-ന് ശേഷം ഒരു മത്സരവും 50 ഓവറിൽ കൂടുതൽ നീണ്ടുനിന്നിട്ടില്ലെങ്കിലും, 2004-ലെ ഏഷ്യ കപ്പിൽ ബംഗ്ലാദേശ് ഇടങ്കയ്യൻ സ്പിന്നർ മുഹമ്മദ് റഫീഖ് ഒരു ഏകദിനത്തിൽ 10.2 ഓവറുകൾ എറിഞ്ഞത് അപൂർവ്വ സംഭവമായി മാറി. 1995 വരെ ഇംഗ്ലണ്ട് മാത്രമാണ് 50 ഓവറിൽ കൂടുതൽ ദൈർഘ്യമുള്ള ഏകദിന മത്സരങ്ങൾക്ക് ആതിഥേയത്വം വഹിച്ചിരുന്നത്.
എഴുപതുകളിൽ ഓസ്‌ട്രേലിയയിലും ന്യൂസിലൻഡിലും നടന്ന ഏഴ് ഏകദിന മത്സരങ്ങൾ 8 പന്തുകൾ വീതമുള്ള 40 ഓവറുകളായിരുന്നു. അവിടെ ഒരു ബൗളർക്ക് പരമാവധി എറിയാൻ കഴിഞ്ഞിരുന്നത് 8 ഓവറുകൾ അഥവാ 64 പന്തുകൾ മാത്രമായിരുന്നു. എന്നാൽ 2004-ൽ ഹോങ്കോങ്ങിനെതിരായ ഏഷ്യ കപ്പ് പോരാട്ടത്തിലാണ് മാച്ച് ഒഫീഷ്യൽസിന് സംഭവിച്ച പിഴവ് മൂലം മുഹമ്മദ് റഫീഖ് 10 ഓവറിലധികം പന്തെറിഞ്ഞത്.
മത്സരത്തിൽ റഫീഖ് തന്റെ നിശ്ചിത 10 ഓവർ ക്വാട്ട ചേസിങ്ങിന്റെ 44-ാം ഓവറിൽ തന്നെ 19 റൺസ് മാത്രം വഴങ്ങി ഒരു വിക്കറ്റ് എന്ന നിലയിൽ പൂർത്തിയാക്കിയിരുന്നു. എന്നാൽ ഒഫീഷ്യൽസിന്റെ കണക്കുകൂട്ടലിൽ വന്ന തെറ്റ് കാരണം 46-ാം ഓവർ എറിയാനും റഫീഖ് എത്തുകയായിരുന്നു. ഈ ഓവറിലെ ആദ്യ പന്തിൽ ഖാലിദ് ഖാൻ രണ്ട് റൺസ് നേടുകയും തൊട്ടടുത്ത പന്തിൽ പുറത്താവുകയും ചെയ്തതോടെ ഹോങ്കോങ് ഇന്നിങ്സ് 105 റൺസിൽ അവസാനിച്ചു.
ബംഗ്ലാദേശ് ഉയർത്തിയ 221/9 എന്ന സ്കോറിന് മുന്നിൽ പതറിയ ഹോങ്കോങ്ങിനെതിരെ 116 റൺസിന്റെ വമ്പൻ വിജയമാണ് ബംഗ്ലാദേശ് സ്വന്തമാക്കിയത്. ഏഷ്യ കപ്പിന്റെ മുൻപത്തെ ആറ് പതിപ്പുകളിലായി തുടർച്ചയായ 16 മത്സരങ്ങൾ തോറ്റ ബംഗ്ലാദേശിന്റെ ഏഷ്യ കപ്പ് ചരിത്രത്തിലെ കന്നി വിജയം കൂടിയായിരുന്നു ഇത്.
