ക്രിക്കറ്റ് ചരിത്രത്തിലെ ഏറ്റവും വിചിത്രമായ പ്രതിഷേധങ്ങളിലൊന്ന് അരങ്ങേറിയത് 2017 ഏപ്രിൽ 11-നായിരുന്നു. ബംഗ്ലാദേശിലെ ധാക്ക സെക്കൻഡ് ഡിവിഷൻ ക്രിക്കറ്റ് ലീഗിൽ നാല് നിയമാനുസൃത പന്തുകളിൽ 92 റൺസ് വഴങ്ങി ലാൽമതിയ ക്ലബ് ബൗളർ സുജോൻ മഹ്മൂദ് ക്രിക്കറ്റ് ലോകത്തെ ഞെട്ടിച്ചു. മോശം അമ്പയറിങ്ങിനെതിരെയുള്ള പ്രതിഷേധത്തിന്റെ ഭാഗമായാണ് ടീം മനഃപൂർവം ഇത്തരമൊരു നീക്കം നടത്തിയത്.
ആക്സിയം ക്രിക്കറ്റേഴ്‌സിനെതിരായ മത്സരത്തിൽ ആദ്യം ബാറ്റ് ചെയ്ത ലാൽമതിയ ക്ലബ് 14 ഓവറിൽ വെറും 88 റൺസിന് പുറത്തായി. തുടർന്ന് ലക്ഷ്യം പിന്തുടർന്ന ആക്സിയത്തിന് മുന്നിൽ ബൗളിങ്ങിനിറങ്ങിയ സുജോൻ മഹ്മൂദ് 20 പന്തുകൾ എറിഞ്ഞെങ്കിലും നാലെണ്ണം മാത്രമാണ് നിയമാനുസൃതമായത്. 15 നോബോളുകളും 13 വൈഡുകളും ഉൾപ്പെട്ട ഓവറിൽ അധിക റൺസായി മാത്രം 80 റൺസ് വഴങ്ങിയതായാണ് റിപ്പോർട്ടുകൾ. നിയമാനുസൃതമായ നാല് പന്തുകളിൽ നിന്ന് ആക്സിയം ബാറ്റർ 12 റൺസ് കൂടി നേടിയതോടെ ടീം വിക്കറ്റ് നഷ്ടമില്ലാതെ വെറും നാല് പന്തുകളിൽ വിജയലക്ഷ്യം മറികടന്നു.
ടോസ് നടന്നപ്പോൾ തങ്ങളുടെ ക്യാപ്റ്റനെ നാണയം കാണാൻ പോലും അനുവദിച്ചില്ലെന്നും അമ്പയറിങ്ങിൽ പക്ഷപാതപരമായ തീരുമാനങ്ങളുണ്ടായെന്നുമായിരുന്നു ലാൽമതിയ ക്ലബിന്റെ ആരോപണം. ഇതിനെതിരെയുള്ള പ്രതിഷേധമായാണ് ടീം മത്സരം ഇത്തരത്തിൽ അവസാനിപ്പിക്കാൻ ശ്രമിച്ചതെന്ന് ക്ലബ് അധികൃതർ വിശദീകരിച്ചു.
എന്നാൽ ഈ പ്രതിഷേധത്തിന് വലിയ വില നൽകേണ്ടിവന്നു. സംഭവത്തിൽ ബംഗ്ലാദേശ് ക്രിക്കറ്റ് ബോർഡ് കടുത്ത അച്ചടക്കനടപടികൾ സ്വീകരിച്ചു. സുജോൻ മഹ്മൂദിന് പത്ത് വർഷത്തെ വിലക്ക് ഏർപ്പെടുത്തിയതായും ലാൽമതിയ ക്ലബിനെ അനിശ്ചിതകാലത്തേക്ക് മത്സരങ്ങളിൽ നിന്ന് വിലക്കി. ക്ലബിന്റെ പരിശീലകൻ, ക്യാപ്റ്റൻ, മാനേജർ എന്നിവർക്ക് അഞ്ച് വർഷത്തെ വിലക്കും ലഭിച്ചു.
അമ്പയറിങ്ങിനെതിരെയുള്ള പ്രതിഷേധം ക്രിക്കറ്റ് ചരിത്രത്തിലെ തന്നെ അപൂർവമായൊരു സംഭവമായി മാറിയെങ്കിലും, കളിയുടെ മാന്യതയെ ചോദ്യം ചെയ്ത ഈ നീക്കം താരങ്ങൾക്കും ക്ലബിനും വലിയ തിരിച്ചടിയായി. വെറും നാല് പന്തുകളിൽ 92 റൺസ് വഴങ്ങിയ ആ വിചിത്ര ഇന്നിങ്‌സ് ഇന്നും ക്രിക്കറ്റ് ലോകത്ത് ചർച്ച ചെയ്യപ്പെടുന്ന സംഭവങ്ങളിലൊന്നാണ്.
