കുരുക്ഷേത്ര യുദ്ധത്തെ കോവിഡ് മഹാമാരിയോട് ഉപമിച്ച് പ്രധാനമന്ത്രി നരേന്ദ്രമോദി. “മഹാഭാരതത്തിൽ, കുരുക്ഷേത്ര യുദ്ധം ജയിക്കാൻ എടുത്തത് 18 ദിവസമാണ്.കോവിഡ് എന്ന ആഗോളവ്യാപകമായ മഹാമാരിക്കെതിരെയുള്ള യുദ്ധം, നമ്മൾ 21 ദിവസത്തിനുള്ളിൽ ജയിക്കും” എന്നാണ് പ്രധാനമന്ത്രി അഭിപ്രായപ്പെട്ടത്. 130 കോടി ജനങ്ങളുടെ ബലത്തിലായിരിക്കും നമ്മളീ യുദ്ധം ജയിക്കുകയെന്നും അദ്ദേഹം കൂട്ടിച്ചേർത്തു. സുപ്രധാനമായ കാര്യങ്ങളിൽ ജനം ശ്രദ്ധ നൽകുന്നില്ല, അത് തിരുത്തണമെന്നു പറഞ്ഞ മോദി, അശ്രദ്ധ കാണിച്ചാൽ രാജ്യത്തിന് ചിന്തിക്കാൻ കഴിയുന്നതിലും വലിയ വില കൊടുക്കേണ്ടി വരുമെന്നും ഓർമ്മിപ്പിച്ചു.
വീടുകളിൽ നിന്നും ആരും പുറത്തിറങ്ങരുതെന്നും സമ്പൂർണ്ണ ലോക് ഡൗണിലൂടെയാണ് മറ്റു രാജ്യങ്ങളിൽ വൈറസ് പടരുന്നത് നിയന്ത്രിച്ചതെന്നും, നമ്മളുമതേ മാർഗമാണ് അവലംബിക്കുന്നതെന്നും അദ്ദേഹം പറഞ്ഞു. വ്യാപനത്തിന്റെ വേഗത കൂടിയാൽ പിടിച്ചുകെട്ടാൻ സാധിക്കില്ലെന്നും പ്രധാനമന്ത്രി മുന്നറിയിപ്പു നൽകി.
