ലക്നൗ : സ്ത്രീകൾക്കെതിരെയുള്ള കുറ്റകൃത്യങ്ങൾ ഒരു കാരണവശാലും ക്ഷമിക്കില്ലെന്ന് ഉത്തർപ്രദേശ് മുഖ്യമന്ത്രി യോഗി ആദിത്യനാഥ്. സർക്കാർ തുടർച്ചയായി നടപടി എടുക്കുന്നതിനാൽ പെൺകുട്ടികൾക്കും സ്ത്രീകൾക്കും നേരെയുള്ള കുറ്റകൃത്യങ്ങളിൽ വളരെയധികം കുറവ് വന്നിട്ടുണ്ടെന്നും മുഖ്യമന്ത്രി പറഞ്ഞു.
ഒക്ടോബർ 17 ന് ആരംഭിക്കുന്ന നവരാത്രി ആഘോഷങ്ങളിൽ സ്ത്രീകൾ സുരക്ഷിതരായിരിക്കാൻ പ്രത്യേക ക്യാമ്പയിൻ ആരംഭിക്കുന്നതിന് യോഗി ബുധനാഴ്ച അധികൃതർക്ക് നിർദ്ദേശം നൽകിയിരുന്നു. പട്ടികജാതി-പട്ടികവർഗ്ഗവുമായി ബന്ധപ്പെട്ട കേസുകളിൽ പ്രത്യേക ശ്രദ്ധ വേണമെന്നും യോഗി ആദിത്യനാഥ് പോലീസുകാർക്ക് നിർദേശം നൽകിയിട്ടുണ്ട്.
2019 ലെ നാഷണൽ ക്രൈം റെക്കോർഡ്സ് ബ്യൂറോയുടെ കണക്കുകൾ പ്രകാരം സ്ത്രീകൾക്കെതിരെയുള്ള കുറ്റകൃത്യങ്ങൾ ചെയ്തവരിൽ 55.2 ശതമാനം പേർക്കെതിരെയും സംസ്ഥാനം ശിക്ഷാനടപടികൾ സ്വീകരിച്ചിട്ടുണ്ട്. അതായത് കഴിഞ്ഞ വർഷം മാത്രം സംസ്ഥാനത്തെ 8,059 സ്ത്രീകൾക്കെതിരായ കുറ്റകൃത്യങ്ങൾ ചെയ്ത കേസുകളിലാണ് ശിക്ഷ വിധിച്ചത്.
