ഗുരുവായൂർ: ഗുരുവായൂർ ക്ഷേത്രത്തിലെ ഉത്സവത്തിന് തുടക്കം കുറിച്ച് ഇന്ന് കൊടിയേറ്റ് നടക്കും. കൊവിഡ് നിയന്ത്രണങ്ങളോടെയായിരിക്കും ഉത്സവ ചടങ്ങുകൾ. ഭക്തർക്ക് പ്രവേശന നിയന്ത്രണം ഉണ്ടാകും.
ഉത്സവ ദിവസങ്ങളില്‍ ക്ഷേത്ര ദര്‍ശനത്തിന് വെര്‍ച്വല്‍ ക്യൂ മുഖേന 5000 ഭക്തർക്ക് മാത്രമേ ദർശന സൗകര്യം ഉണ്ടാകൂ. ഉത്സവത്തിന്റെ ഭാഗമായി നടത്തി വരുന്ന പ്രസാദ ഊട്ട് ഇക്കുറി ചടങ്ങ് മാത്രമായി നടത്തും. ഗുരുവായൂര്‍ ക്ഷേത്രോത്സവത്തിന്റെ ഭാഗമായി നടക്കുന്ന ആനയോട്ടത്തിന് മൂന്ന് ആനകളെ പങ്കെടുപ്പിക്കാന്‍ ജില്ലാ ഭരണകൂടം അനുമതി നല്‍കി.
ദേവദാസ്, ഗോപീകണ്ണന്‍, ഗോപീകൃഷ്ണന്‍ എന്നീ ആനകളെയാണ് ഓടുന്നതിനായി നറുക്കെടുപ്പിലൂടെ തിരഞ്ഞെടുത്തത്. രവികൃഷ്ണ, ചെന്താമരാക്ഷന്‍ എന്നീ ആനകളെ കരുതലായും നിർത്തും. സാധാരണ ഇരുപതിലധികം ആനകളാണ് ആനയോട്ടത്തില്‍ പങ്കെടുക്കാറുള്ളത്. ഇത്തവണ കോവിഡിന്റെ പശ്ചാത്തലത്തിലാണ് ആനകളുടെ എണ്ണത്തിൽ നിയന്ത്രണം ഏർപ്പെടുത്തിയത്.
