സിപിഎമ്മും യുഡിഎഫും ആദിവാസികളെ അടിമകളാക്കി നിർത്തിയെന്ന് സി കെ ജാനു. തനിക്കെതിരെ ഇപ്പോൾ നടക്കുന്നത് വംശീയ ആക്രമണമാണെന്നും അത് നിയമപരമായി നേരിടുമെന്നും അവർ പറഞ്ഞു. താൻ നല്ല സാരി ഉടുത്താൽ പോലും വിവാദം ആക്കുകയാണെന്നും അവർ കൂട്ടിച്ചേർത്തു.
ആദിവാസി വിഭാഗത്തിൽ നിന്നുള്ള നേതാവ് ആയത് കൊണ്ടാണ് തനിക്കെതിരെ ആരോപണം ഉയരുന്നത്. തനിക്കെതിരെ ഉയരുന്നത് അടിസ്ഥാനരഹിതമായ വാർത്തകളാണ്. ആരും, ചോദിക്കാനും, പറയാനും ഇല്ലാത്തത് കൊണ്ടാണോ തന്നെ വളഞ്ഞിട്ട് അക്രമിക്കുന്നത്. താൻ ആത്മഹത്യ ചെയ്യണമെന്നാണോ പറയുന്നതെന്നും സി കെ ജാനു ചോദിക്കുന്നു.
താൻ കുറ്റം ചെയ്തിട്ടില്ല. അതിനാൽ കേസിൽ നിന്നും ഒളിച്ചോടില്ല. പ്രസീതയുടെ കൈയ്യിൽ ആരോപണം തെളിയിക്കാൻ തെളിവുണ്ടെങ്കിൽ കോടതിയിൽ ഹാജരാക്കട്ടെയെന്നും നിയമപരമായി തന്നെ കേസിനെ നേരിടുമെന്നും സി കെ ജാനു ആവർത്തിച്ചു.
