ലൂസിഫർ എന്ന ഇൻഡസ്ട്രി ഹിറ്റിന് ശേഷം മോഹൻലാലിനെ നായകനാക്കി പൃഥ്വിരാജ് സുകുമാരൻ സംവിധാനം ചെയ്യുന്ന ഫാമിലി എന്റർടെയ്നർ ബ്രോ ഡാഡിയുടെ ട്രെയ്ലർ യൂട്യൂബിൽ തരംഗമാകുന്നു. കഴിഞ്ഞ ദിവസം റിലീസായ ട്രെയ്ലർ ഇതേവരെ യൂട്യൂബിൽ കണ്ടത് മൂന്ന് കോടിക്കടുത്ത് ആളുകളാണ്. ട്രെയ്ലർ ഇപ്പോഴും യൂട്യൂബ് ട്രെൻഡിംഗിൽ ഒന്നാമതാണ്.
ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂർ ആണ് ബ്രോ ഡാഡി നിർമ്മിക്കുന്നത്. മോഹൻലാലിന് പുറമെ മീന, പൃഥ്വിരാജ്, കല്യാണി പ്രിയദർശൻ, ലാലു അലക്സ്, കനിഹ, ജാഫർ ഇടുക്കി, സൗബിൻ ഷാഹിർ, ഉണ്ണി മുകുന്ദൻ, ജഗദീഷ്, മല്ലിക സുകുമാരൻ തുടങ്ങി വലിയ താരനിരയാണ് ചിത്രത്തിൽ അണിനിരക്കുന്നത്.
ശ്രീജിത്ത് എൻ, ബിബിൻ മാളിയേക്കൽ എന്നിവർ ചേർന്നാണ് ബ്രോ ഡാഡിയുടെ തിരക്കഥ തയ്യാറാക്കിയിരിക്കുന്നത്. അഭിനന്ദൻ രാമാനുജം ഛായാഗ്രഹണവും ദീപക് ദേവ് സംഗീത സംവിധാനവും നിർവ്വഹിച്ചിരിക്കുന്ന ചിത്രത്തിന്റെ എഡിറ്റിംഗ് അഖിലേഷ് മോഹനാണ് കൈകാര്യം ചെയ്തിരിക്കുന്നത്.
ഹാസ്യത്തിന് പ്രാധാന്യം നൽകി ഒരുക്കിയിരിക്കുന്ന ഫാമിലി എന്റർടെയ്നറായ ബ്രോ ഡാഡി ഒടിടി റിലീസായി ജനുവരി 26ന് ഡിസ്നി പ്ലസ് ഹോട്ട്സ്റ്റാർ മൾട്ടിപ്ലെക്സിൽ പ്രദർശനം ആരംഭിക്കും.
