ലണ്ടൻ: സീറ്റ് ബെൽറ്റ് ധരിക്കാതെ വാഹനത്തിൽ യാത്ര ചെയ്ത സംഭവത്തിൽ ക്ഷമ ചോദിച്ച് ബ്രിട്ടീഷ് പ്രധാനമന്ത്രി ഋഷി സുനക്. സമൂഹമാദ്ധ്യമത്തിലൂടെയായിരുന്നു അദ്ദേഹം നിയമ ലംഘനത്തിന് ക്ഷമ ചോദിച്ച് രംഗത്ത് എത്തിയത്. സീറ്റ് ബെൽറ്റ് ധരിച്ച് യാത്ര ചെയ്തതിന് അദ്ദേഹം പിഴയും അടച്ചു.
കഴിഞ്ഞ ദിവസമാണ് സീറ്റ് ബെൽറ്റ് ധരിക്കാതെ ഋഷി സുനക് കാറിൽ സഞ്ചരിച്ചത്. കാർ യാത്രയുടെ വീഡിയോ അദ്ദേഹം സമൂഹമാദ്ധ്യമത്തിൽ പങ്കുവെച്ചിരുന്നു. ഇതോടെ സീറ്റ് ബെൽറ്റ് ധരിക്കാത്തത് ചൂണ്ടിക്കാട്ടി ആളുകൾ രംഗത്ത് വരികയായിരുന്നു. വീഡിയോ വ്യാപകമായി പ്രചരിച്ചതോടെയായിരുന്നു സംഭവം പോലീസുകാരുടെ ശ്രദ്ധയിൽപ്പെട്ടത്. ഇതോടെ അദ്ദേഹത്തിൽ നിന്നും പിഴ ഈടാക്കുകയായിരുന്നു.
കാറിൽ പിന്നിലെ സീറ്റിൽ ഇരുന്നായിരുന്നു അദ്ദേഹം യാത്ര ചെയ്തിരുന്നത്. കാർ യാത്രികർ സീറ്റ് ബെൽറ്റ് ധരിച്ച് മാത്രമേ യാത്ര ചെയ്യാവൂ എന്നാണ് നിയമം. ഇത് ലംഘിച്ചതിനാണ് അദ്ദേഹത്തിൽ നിന്നും പിഴ ഈടാക്കിയത്.
അതേസമയം പിഴയടച്ച്, സംഭവത്തിൽ മാപ്പ് ചോദിച്ച ഋഷി സുനകിന് വലിയ അഭിനന്ദനമാണ് സമൂഹമാദ്ധ്യമങ്ങളിൽ ഉയരുന്നത്. പ്രധാനമന്ത്രി ആയിട്ടും പിഴ അടയ്ക്കാനും, മാപ്പ് പറയാനും അദ്ദേഹം കാണിച്ച വിവേകമാണ് പ്രശംസയ്ക്ക് ആധാരം.
