ജയ്പൂർ: നിയമസഭയിൽ പഴയ ബജറ്റ് തന്നെ അവതരിപ്പിച്ച് രാജസ്ഥാൻ മുഖ്യമന്ത്രി അശോക് ഗെഹ്‌ലോട്ട്. പ്രതിപക്ഷം ശക്തമായ പ്രതിഷേധവുമായി രംഗത്ത് എത്തിയതിനെ തുടർന്ന് സഭ നിർത്തിവച്ചു. കഴിഞ്ഞ വർഷത്തെ ബജറ്റാണ് സർക്കാരിന്റെ പുതിയ ബജറ്റ് എന്ന രീതിയിൽ മുഖ്യമന്ത്രി വീണ്ടും അവതരിപ്പിച്ചത്.
രാവിലെ 10 മണിയോട് കൂടിയാണ് ബജറ്റ് അവതരണത്തിനായി മുഖ്യമന്ത്രി സഭയിൽ എത്തിയത്. എന്നാൽ ബജറ്റിലെ ആദ്യ രണ്ട് വരി വായിച്ചതോടെ അവതരിപ്പിക്കുന്നത് പഴയ ബജറ്റാണെന്ന് വ്യക്തമാകുകയായിരുന്നു. ഇതോടെ എംഎൽഎമാർ ശക്തമായി പ്രതിഷേധിച്ചു. പ്രതിഷേധം നടുത്തളത്തിൽ എത്തിയതോടെ സ്പീക്കർ സഭ നിർത്തിവച്ചതായി അറിയിക്കുകയായിരുന്നു.
അതേസമയം ഒരു പേജിൽ മാത്രമാണ് കഴിഞ്ഞ വർഷത്തെ പ്രഖ്യാപനങ്ങൾ ആവർത്തിക്കുന്നത് എന്ന് അശോക് ഗെഹ്‌ലോട്ട് പറഞ്ഞു. ബജറ്റിന്റെ ബാക്കി കാര്യങ്ങൾ വായിക്കാൻ പ്രതിപക്ഷം അനുവദിച്ചില്ല. ബജറ്റ് അവതരിപ്പിക്കാൻ അനുവദിക്കണമെന്ന തന്റെ ആവശ്യം പ്രതിപക്ഷം അംഗീകരിച്ചില്ലെന്നും അദ്ദേഹം പറഞ്ഞു.
സംസ്ഥാനത്തിന്റെ ചരിത്രത്തിൽ ആദ്യാമായാണ് ബജറ്റ് അവതരണ വേളയിൽ സഭ നിർത്തിവയ്‌ക്കേണ്ട സാഹചര്യം ഉണ്ടാകുന്നത്.
