സ്വപ്‌നങ്ങളുടെയും അഭിലാഷങ്ങളുടെയും പിറകേ പോകാന്‍ ഒട്ടും മടി കാണിക്കാതിരിക്കുക, സംശയിക്കാതിരിക്കുക എന്നതാണ് സ്വന്തമായി ഒരു ബിസിനസ് ആരംഭിക്കാന്‍ ആഗ്രഹിക്കുന്നവര്‍ ആദ്യം ചെയ്യേണ്ടത്. ബെംഗളൂരുവിലെ നിധി സിംഗും ഭര്‍ത്താവായ ശിക്കാര്‍ വീര്‍സിംഗും ചെയ്തത് അതാണ്. ആരും മോഹിക്കുന്ന ശമ്പളമുള്ള ജോലി ഉപേക്ഷിച്ചും സ്വന്തം വീട് വിറ്റുമാണ് അവര്‍ അവരുടെ സ്വപ്‌നങ്ങള്‍ക്കും അഭിലാഷങ്ങള്‍ക്കും പിറകേ പോയത്. സമൂസ വില്‍ക്കുന്ന ഒരു ബിസിനസ് ആരംഭിക്കുക എന്നത് മാത്രമായിരുന്നു അവരുടെ ലക്ഷ്യം.
ഇത്രയും വലിയ ജോലി ഉപേക്ഷിച്ച,് വീട് വിറ്റ്, സമൂസ വിറ്റ് ജീവിക്കാന്‍ പോകുകയാണെന്ന് കേട്ടപ്പോള്‍ അവര്‍ ഒരുപാട് കളിയാക്കലുകളും പുച്ഛിക്കലുകളും കാണുകയും കേള്‍ക്കുകയും ചെയ്തു. പക്ഷേ അവസാനം ചിരിക്കുക തങ്ങളായിരിക്കുമെന്ന വിശ്വാസം അവര്‍ കൈവിട്ടില്ല. ഇന്നവര്‍, നേരത്തെ ചെയ്തിരുന്ന ജോലികളില്‍ നിന്നുള്ള വരുമാനത്തേക്കാള്‍ എത്രയോ ഇരട്ടി സമ്പാദിക്കുന്നു.
2015ലാണ് നിധിയും ശിക്കാര്‍ സിംഗും തങ്ങളുടെ ജോലി വിട്ട് ബെംഗളൂരില്‍ സമൂസ സിംഗ് എന്ന ഫുഡ് സ്റ്റാര്‍ട്ടപ്പ് ആരംഭിക്കുന്നത്. അടുക്കള കുറച്ചുകൂടി വലുതാക്കേണ്ടതായി വന്നപ്പോള്‍ അവര്‍ അവരുടെ അപ്പാര്‍ട്‌മെന്റ് വിറ്റ് ആ പണം കൊണ്ട് ബെംഗളൂരുവില്‍ ഒരു ഫാക്ടറി വാടകയ്ക്ക് എടുത്തു. വര്‍ഷങ്ങള്‍ കൊണ്ടുതന്നെ അവരുടെ സംരംഭം വലിയ വളര്‍ച്ച സ്വന്തമാക്കി. നിലവില്‍ 45 കോടി രൂപയാണ് അവരുടെ വാര്‍ഷിക വിറ്റുവരവ്. അതായത് ഒരു ദിവസം അവര്‍ ഏകദേശം 12 ലക്ഷം രൂപ സമ്പാദിക്കുന്നു.
ഹരിയാന സ്വദേശികളായ നിധിയും ശിക്കാറും കുരുക്ഷേത്ര സര്‍വ്വകലാശാലയില്‍ ബിടെക്ക് ബയോടെക്‌നോളജി പഠിക്കുന്ന കാലത്താണ് ആദ്യമായി കാണുന്നതും പരിചയപ്പെടുന്നതും. പഠിക്കുന്ന കാലത്ത് തന്നെ സമൂസ ബിസിനസ് ആരംഭിക്കണമെന്ന സ്വപ്‌നം ശിക്കാറിനുണ്ടായിരുന്നു. പക്ഷേ ഒരു ശാസ്ത്രജ്ഞന്‍ ആകാനാണ് നിധി ശിക്കാറിനെ ഉപദേശിച്ചത്. നിധിയുടെ ആഗ്രഹപ്രകാരം ഹൈദരാബാദില്‍ നിന്നും എംടെക്ക് എടുത്ത ശിക്കാര്‍ ബയോകോണില്‍ പ്രിന്‍സിപ്പല്‍ ശാസ്ത്രജ്ഞനായി. നിധിക്കും ഒരു ഫാര്‍മ കമ്പനിയില്‍ വര്‍ഷം 30 ലക്ഷം വരുമാനമുള്ള ജോലിയുണ്ടായിരുന്നു.
അങ്ങനെയിരിക്കെയാണ് ഒരിക്കല്‍ ഒരു ഫുഡ് കോര്‍ട്ടില്‍ നില്‍ക്കുമ്പോള്‍ ഒരു കുട്ടി സമൂസയ്ക്കായി കരയുന്നത് ശിക്കാര്‍ കണ്ടത്. ഇതാണ് തനിക്ക് പ്രതീക്ഷയുടെ കച്ചിത്തുരുമ്പായി മാറിയതെന്ന് ശിക്കാര്‍ പറയുന്നു. സമൂസ സ്റ്റാര്‍ട്ടപ്പ് എന്ന തന്റെ ലക്ഷ്യം ശരിയായ പാതയിലാണെന്നും ഇന്ത്യക്കാര്‍ ഏറ്റവുമിഷ്ടപ്പെടുന്ന പലഹാരങ്ങളിലൊന്നാണ് സമൂസയെന്നും അന്ന് ശിക്കാറിന് ബോധ്യപ്പെട്ടു.
അങ്ങനെ ശിക്കാര്‍ ജോലി വിട്ട് ബെംഗളൂരുവില്‍ ബിസിനസ് ആരംഭിച്ചു. ഇന്നത് വലിയ സംരംഭമായി ഉയര്‍ന്നു. സാധാരണ സമ്മൂസകളില്‍ നിന്നും വ്യത്യസ്തമാണ് സമൂസ സിംഗിലെ സമൂസകള്‍. കടായി പനീര്‍ സമൂസ പോലെ വളരെ വ്യത്യസ്തമാ സമൂസകള്‍ ഇവിടെ ലഭിക്കും. ബിസിനസ് കൂടുതല്‍ വിപുലീകരിക്കാനുള്ള പദ്ധതിയിലാണ് ഇപ്പോള്‍ ഈ ദമ്പതികള്‍.
