കേരളത്തിലെ അപൂർവം ചില ശ്രീരാമക്ഷേത്രങ്ങളിൽ ഒന്നാണ് കളത്തിൽ ശ്രീരാമസ്വാമി ക്ഷേത്രം.വലുപ്പത്തിൽ ചെറുതെങ്കിലും പ്രതിഷ്ഠാചൈതന്യം കൊണ്ട് ഏറെ വേറിട്ട് നിൽക്കുന്ന ക്ഷേത്രമാണ് ഇത്. എറണാകുളം ജില്ലയിലെ പൂക്കാട്ടുപടിയിൽ ആണ് ഈ ക്ഷേത്രം സ്ഥിതി ചെയ്യുന്നത്. നൂറ്റാണ്ടുകൾ പഴക്കമുള്ള ക്ഷേത്രം പുതുക്കി പണിത് പുനപ്രതിഷ്ഠ നടത്തിയത് 1999 ലാണ് .
ശത്രുനിഗ്രഹം കഴിഞ്, തന്റെ പ്രിയതമയോട് ചേരുന്ന അതീവ സന്തുഷ്ടനും പ്രസന്നവദനനുമായ രൂപത്തിലാണ് ദേവപ്രതിഷ്ഠ. അതിനാൽ തന്നെ പ്രാർത്ഥിക്കുന്ന കാര്യങ്ങൾ ഫലം കാണും എന്നാണ് വിശ്വാസം. ശത്രു ദോഷ പരിഹാരങ്ങൾക്കും ധന ധാന്യ സമൃദ്ധിക്കും കുടുംബസൗഖ്യത്തിനും ഭക്തർ ഇവിടെയെത്തുന്നു. കളത്തിൽ കുടുംബത്തിന്റെ പരദേവതാ ക്ഷേത്രമാണ് കളത്തിൽ ശ്രീരാമ സ്വാമി ക്ഷേത്രം.
അര ഏക്കറിൽ മതിൽകെട്ടും നാലമ്പലവും ക്ഷേത്രക്കിണറും തിടപ്പള്ളിയും ചേർത്താണ് ക്ഷേത്ര നിർമാണം. ശാസ്താവ്, ഭുവനേശ്വരി, ഹനുമാൻ, നാഗങ്ങൾ, ബ്രഹ്മ രക്ഷസ് എന്നീ ഉപപ്രതിഷ്ഠകളും ക്ഷേത്രത്തെ ധന്യമാക്കുന്നു. ക്ഷേത്രാങ്കണത്തിൽ പടർന്നു നിൽക്കുന്ന ആൽവൃക്ഷച്ചോട്ടിലാണ് ബ്രഹ്മരക്ഷസിന്റെ പ്രതിഷ്ഠ.ശ്രീരാമ സ്വാമിയുടെ ജന്മ നക്ഷത്രമായ പുണർതം നാളിൽ എല്ലാ മാസവും വിശേഷാൽ പൂജകൾ നടത്തിവരുന്നു
ഗണപതിഹോമത്തോടെയാണ് ക്ഷേത്രത്തിലെ ദിവസപൂജകൾക്ക് തുടക്കം. പാൽപ്പായസമാണ് ശ്രീരാമ സ്വാമിയുടെ ഇഷ്ട വഴിപാട്. അവൽ നിവേദ്യം, പുരുഷസൂക്‌തം നാഗങ്ങൾക്ക് മംഗളാഭിഷേകം എന്നിവയാണ് ക്ഷേത്രത്തിലെ മറ്റു പ്രധാന വഴിപാടുകൾ. എല്ലാവർഷവും മെയ് 12 ന് ആചാരവിധിപ്രകാരം ക്ഷേത്രത്തിൽ പ്രതിഷ്ഠാദിനം ആചരിക്കുന്നു.മറ്റ് ക്ഷേത്രങ്ങളിൽ നിന്നും വിഭിന്നമായി ഇവിടെ രാവിലെ മാത്രമാണ് പൂജയുള്ളത്.
കർക്കിടകമാസത്തിൽ വിശേഷാൽ പൂജകൾ നടക്കുന്ന ഈ ക്ഷേത്രത്തിൽ പതിവിലേറെ ഭക്തർ ദർശനം നടത്തുന്നു.
