ന്യൂഡൽഹി: ആത്മീയതയെ ഇന്ത്യയുടെ മൃദുശക്തി എന്ന് വിശേഷിപ്പിച്ച് യോഗ ഗുരു രാംദേവ്. ഇന്നത്തെ നൂറ്റാണ്ട് ശാസ്ത്രത്തിന്റെയും ആത്മീയതയുടെയുംതാണ്. നൂറ്റാണ്ടുകളായി രാജ്യത്ത് നടപ്പാക്കിവരുന്ന ആത്മീയതയാണ് ഇന്ത്യയുടെ മൃദുശക്തിയെന്നായിരുന്നു ഗുരു രാംദേവിന്റെ പരാമർശം. ലോകമെമ്പാടുമുള്ള ആളുകൾ ഇപ്പോൾ അനുഭവിക്കുന്ന സമ്മർദ്ദം,ഉത്കണ്ഠ, തുടങ്ങിയ പ്രശ്‌നങ്ങൾക്ക് യോഗ പരിഹാരം വാഗ്ദാനം ചെയ്യുന്നുവെന്ന് അദ്ദേഹം പറഞ്ഞു.
അവധി ആഘോഷിക്കുന്നവർക്കായി ഹോട്ടലുകളിൽ യോഗ,ധ്യാന പരിപാടികൾ ഏർപ്പെടുത്താൻ അദ്ദേഹം ഗോവ ടൂറിസം വകുപ്പിനോട് അഭ്യർത്ഥിച്ചു. ഗോവയിലെ ഹോട്ടലുകളിൽ യോഗയ്ക്കും ധ്യാനത്തിനുമായി ഒരു മുറിയുണ്ടെന്ന് ഉറപ്പുവരുത്താൻ രാംദേവ് ഗോവ ടൂറിസം വകുപ്പിനോട് നിർദ്ദേശിച്ചു, ഇതിലൂടെ വിനോദസഞ്ചാരികൾ താമസിക്കുന്ന സമയത്ത് ആസ്വദിക്കുക മാത്രമല്ല, മനസ്സമാധാനം കണ്ടെത്തുകയും ചെയ്യുന്നുവെന്ന് അദ്ദേഹം ചൂണ്ടിക്കാട്ടി.
സമ്പന്നമായ പൈതൃകവും വൈവിധ്യമാർന്ന സംസ്‌കാരവും സാക്ഷ്യപ്പെടുത്താനും അനുഭവിക്കാനും പൗരന്മാരെ പ്രോത്സാഹിപ്പിക്കുകയെന്ന ലക്ഷ്യത്തോടെ കേന്ദ്രത്തിന്റെ ‘ദേഖോ അപ്നാ ദേശ്’ പരിപാടി മുന്നോട്ട് കൊണ്ടുപോകുന്നതിന് ഗോവ, ഉത്തരാഖണ്ഡ് സർക്കാരുകൾ സ്വീകരിച്ച മുൻകൈയുടെ ഭാഗമായി ഗോവ ടൂറിസം മന്ത്രി രോഹൻ ഖൗണ്ട ഹരിദ്വറിൽ വച്ച് രാംദേവുമായി കൂടിക്കാഴ്ച നടത്തി.
