ന്യൂയോർക്ക് : യുണൈറ്റഡ് സ്റ്റേറ്റ്സിലെ ഏറ്റവും വലിയ ഹിന്ദു ക്ഷേത്രം ന്യൂജേഴ്‌സിയിൽ നിർമ്മാണം പൂർത്തീകരിച്ചു. BAPS സ്വാമിനാരായൺ അക്ഷർധാം എന്ന പേരിൽ അറിയപ്പെടുന്ന ക്ഷേത്രത്തിന്റെ ഉദ്ഘാടനം ഒക്ടോബർ എട്ടിന് നിർവഹിക്കും. ഇന്ത്യയ്ക്ക് പുറത്തുള്ള ഹിന്ദു ക്ഷേത്രങ്ങളിൽ ലോകത്തെ ഏറ്റവും വലിയ ക്ഷേത്രം കൂടിയാണിത്. ന്യൂയോർക്കിലെ ടൈംസ് സ്ക്വയറിന് 90 കിലോമീറ്റർ തെക്കായാണ് ഈ ക്ഷേത്രം സ്ഥിതി ചെയ്യുന്നത്.
2011 ൽ നിർമ്മാണം ആരംഭിച്ച BAPS സ്വാമിനാരായൺ അക്ഷർധാം 12 വർഷങ്ങൾ കൊണ്ടാണ് നിർമ്മാണം പൂർത്തീകരിച്ചിരിക്കുന്നത്. യുഎസിൽ ഉടനീളമുള്ള 12,500-ലധികം ഹൈന്ദവ സന്നദ്ധപ്രവർത്തകർ ചേർന്നായിരുന്നു ക്ഷേത്രത്തിന്റെ നിർമ്മാണം. 183 ഏക്കറിലായാണ് ഈ മനോഹരമായ ക്ഷേത്രം സ്ഥിതിചെയ്യുന്നത്. 10000ത്തിലേറെ ശില്പങ്ങളും ഇന്ത്യൻ സംഗീത ഉപകരണങ്ങളുടെയും നൃത്തരൂപങ്ങളുടെയും കൊത്തുപണികളും ഈ ക്ഷേത്രത്തിന്റെ സവിശേഷതയാണ്.
പരമ്പരാഗത ഹിന്ദു ക്ഷേത്ര വാസ്തുവിദ്യയിലാണ് BAPS സ്വാമിനാരായൺ അക്ഷർധാം നിർമ്മിച്ചിരിക്കുന്നത്. പരമ്പരാഗത ശിലാ വാസ്തുവിദ്യയിൽ നിർമ്മിച്ചിരിക്കുന്ന ഏറ്റവും വലിയ ദീർഘവൃത്താകൃതിയിലുള്ള താഴികക്കുടവും ഈ അക്ഷർധാമിന് സ്വന്തമാണ്. ചുണ്ണാമ്പുകല്ല്, പിങ്ക് മണൽക്കല്ല്, മാർബിൾ, ഗ്രാനൈറ്റ് എന്നിവയെല്ലാം ഉപയോഗിച്ചാണ് ക്ഷേത്രത്തിന്റെ നിർമ്മാണം പൂർത്തീകരിച്ചിരിക്കുന്നത്.
