എറണാകുളം: മസാല ബോണ്ട് കേസിൽ മുൻ ധനമന്ത്രി തോമസ് ഐസക്കിന് തിരിച്ചടി. എൻഫോഴ്‌സ്‌മെന്റ് ഡയറക്ടറേറ്റിനെതിരെ തോമസ് ഐസക്ക് നൽകിയ ഹർജി ഹൈക്കോടതി തള്ളി. തോമസ് ഐസക്കിന്റെ ആവശ്യത്തിൽ ഇടക്കാല ഉത്തരവ് ഇറക്കാനാവില്ലെന്ന് കോടതി വ്യക്തമാക്കി. ജസ്റ്റിസ് ദേവൻ രാമചന്ദ്രന്റെ ബെഞ്ചാണ് ഹർജി പരിഗണിച്ചത്.
എന്തുകൊണ്ട് ഇഡിയ്ക്ക് മുൻപ് ഹാജരാകുന്നില്ല എന്ന് കോടതി തോമസ് ഐസക്കിനോട് ചോദിച്ചു. ഇഡിയ്ക്ക് മുൻപിൽ ഹാജരാകാൻ എന്താണ് തടസം? അതിൽ നിയമപരമായി എന്ത് തെറ്റാണ് ഉള്ളത്? ഇ.ഡിയുടെ മുമ്പിൽ ഹാജരാകാൻ കോടതിയുടെ ഭാഗത്ത് നിന്ന് സംരക്ഷണം ആവശ്യം ഉണ്ടെങ്കിൽ അതിനുള്ള ഉത്തരവ് നൽകാമെന്നും കോടതി വ്യക്തമാക്കി.
നിയമം ലംഘിച്ചാണ് ഇഡി സമൻസ് അയക്കുന്നതെന്ന് ചൂണ്ടിക്കാട്ടിയാണ് തോമസ് ഐസക്ക് ഹൈക്കോടതിയിൽ ഹർജി നൽകിയത്. ഇന്ന് ചോദ്യം ചെയ്യലിന് ഹാജരാകണമെന്ന് ഇഡി തോമസ് ഐസക്കിനോട് ആവശ്യപ്പെട്ടിരുന്നത്. എന്നാൽ, ഇത്തവണയും തോമസ് ഐസക്ക് ഹാജരായിരുന്നില്ല.
