ചണ്ഡീഗഡ്: ബിജെപി നേതാവ് നയാബ് സിംഗ് സൈനി ഹരിയാനയിലെ പുതിയ മുഖ്യമന്ത്രി. ഇന്ന് വൈകീട്ട് അദ്ദേഹം മുഖ്യമന്ത്രിയായി സത്യപ്രതിജ്ഞ ചെയ്ത് അധികാരമേൽക്കും. മുഖ്യമന്ത്രിയായിരുന്ന ബിജെപി നേതാവ് മനോഹർ ലാൽ ഖട്ടാർ രാവിലെ പദവി രാജിവച്ചിരുന്നു.
ഉച്ചയോടെയായിരുന്നു പുതിയ മുഖ്യമന്ത്രിയുമായി ബന്ധപ്പെട്ട അന്തിമ തീരുമാനം ആയത്. മനോഹർ ലാൽ ഖട്ടാർ തന്നെ വീണ്ടും മുഖ്യമന്ത്രിയായി സത്യപ്രതിജ്ഞ ചെയ്യുമെന്ന് ആയിരുന്നു നേരത്തെ പുറത്തുവന്ന സൂചനകൾ. മന്ത്രിസഭയിലെ മറ്റ് അംഗങ്ങളുമായി ബന്ധപ്പെട്ട തീരുമാനവും ഉടൻ പുറത്തുവരും.
കഴിഞ്ഞ മന്ത്രിസഭയിൽ 14 മന്ത്രിമാർ ആയിരുന്നു ഉണ്ടായിരുന്നത്. ജനനായക് ജനതാ പാർട്ടിയും ബിജെപിയും ചേർന്നുള്ള സഖ്യമായിരുന്നു സംസ്ഥാനത്ത് സർക്കാർ രൂപീകരിച്ചത്. അതിനാൽ മൂന്ന് ജെജെപി മന്ത്രിമാരും സഭയിൽ ഉണ്ടായിരുന്നു.
ബിജെപിയുടെ സംസ്ഥാനത്തെ പ്രബലരായ നേതാവാണ് നയാബ് സിംഗ്. കുരുക്ഷേത്രത്തിയിൽ നിന്നുള്ള എംപി കൂടിയാണ് അദ്ദേഹം. കഴിഞ്ഞ വർഷം ഒക്ടോബറിൽ അദ്ദേഹത്തെ ബിജെപി സംസ്ഥാന അദ്ധ്യക്ഷസ്ഥാനത്തേക്ക് തിരഞ്ഞെടുത്തിരുന്നു. 1996ലാണ് അദ്ദേഹം ബിജെപിയിൽ ചേർന്ന് രാഷ്ട്രീയ ജീവിതം ആരംഭിച്ചത്.
Discussion about this post