ഭോപ്പാൽ : പ്രണയാഭ്യർത്ഥന നിരസിച്ച പെൺകുട്ടിയ്ക്ക് നേരെ ആക്രമണം നടത്തിയ യുവാവ് അറസ്റ്റിൽ. മധ്യപ്രദേശിലെ ഇൻഡോറിൽ ആണ് സംഭവം നടന്നത്. തമിഴ് സിനിമയായ ‘ഐ’ എന്ന വിക്രം ചിത്രത്തിന്റെ മാതൃകയിൽ വൈറസ് കുത്തിവെച്ച് പ്രതികാരം ചെയ്യാനാണ് യുവാവ് ശ്രമിച്ചത്. ഇയാളെ സഹായിച്ച സുഹൃത്തും അറസ്റ്റിൽ ആയിട്ടുണ്ട്.
ഇൻഡോർ സ്വദേശിയായ സഞ്ജയ് എന്ന യുവാവും സുഹൃത്തുമാണ് അറസ്റ്റിൽ ആയത്. ഇയാൾ കുറച്ച് ദിവസങ്ങൾക്കു മുൻപ് ഈ പെൺകുട്ടിയോട് പ്രണയാഭ്യർത്ഥന നടത്തിയിരുന്നു. എന്നാൽ പെൺകുട്ടി ഇത് നിരസിച്ചു. യുവാവ് പിന്നീടും ശല്യം തുടർന്നതോടെ പെൺകുട്ടി പോലീസിൽ പരാതി നൽകിയിരുന്നു. ഇതോടെയാണ് യുവാവ് പെൺകുട്ടിയോട് പ്രതികാരം ചെയ്യാനായി തീരുമാനിച്ചത്.
വിക്രം നായകനായ ഐ എന്ന സിനിമ കണ്ടിട്ടുള്ള ഇയാൾ ഇത്തരത്തിൽ വൈറസ് കുത്തിവെച്ച് പെൺകുട്ടിയെ വിരൂപയാക്കാൻ ആണ് തീരുമാനിച്ചത്. ഇതിനായി വഴിയരികിൽ കഴിഞ്ഞിരുന്ന ഇൻഫെക്ഷൻ ബാധിതനായ ഒരു യാചകന്റെ രക്തമാണ് ഇയാൾ പെൺകുട്ടിക്ക് നേരെ കുത്തിവയ്ക്കാൻ ശ്രമിച്ചത്. എന്നാൽ ഓടി രക്ഷപ്പെട്ട പെൺകുട്ടി പോലീസ് സ്റ്റേഷനിൽ അഭയം പ്രാപിക്കുകയായിരുന്നു. തുടർന്ന് പോലീസ് പ്രതിയായ സഞ്ജയിനെയും സഹായിയായ സുഹൃത്തിനെയും അറസ്റ്റ് ചെയ്തു.
