വിവാദങ്ങളിലൂടെ വാർത്തകളിൽ ഇടം പിടിയ്ക്കുന്ന സിനിമാ താരമാണ് വിനായകൻ. പലപ്പോഴും സ്വന്തം ചെയ്തികൾ അദ്ദേഹത്തിന് രൂക്ഷ വിമർശനമാണ് നേടിക്കൊടുക്കാറുള്ളത്. ഈ അവസരങ്ങളിൽ സമൂഹമാദ്ധ്യമങ്ങളിലൂടെ പ്രതികരിക്കുകയും താരത്തിന്റെ പതിവാണ്. ഇത്തരത്തിൽ കഴിഞ്ഞ ദിവസം തന്റെ അനുഭവത്തെ ആസ്പദമാക്കി താരം പങ്കുവച്ച കുറിപ്പാണ് സമൂഹമാദ്ധ്യമങ്ങൡ ശ്രദ്ധേയമായത്.
കഴിഞ്ഞ ദിവസം താരം നടത്താൻ ശ്രമിച്ച ക്ഷേത്ര ദർശനവും, ഇതിനോട് അനുബന്ധിച്ച് നടന്ന കോലാഹലങ്ങളും ആണ് ഫേസ്ബുക്ക് കുറിപ്പിന് ആധാരം. അദ്ദേഹം പ്രതീക്ഷിച്ച സ്വീകാര്യത ഫേസ്ബുക്ക് കുറിപ്പിന് ലഭിച്ചില്ലെന്ന് മാത്രമല്ല ഇതുവഴി അദ്ദേഹം സോഷ്യൽ മീഡിയയുടെ പരിഹാസത്തിന് പാത്രമാകുകയും ചെയ്തു. എയറിലായതോടെ പിന്നീട് ഫേസ്ബുക്ക് പോസ്റ്റ് പിൻവലിച്ചാണ് താരം രക്ഷപ്പെട്ടത്.
ഇനി സംഗതി എന്താണെന്ന് നോക്കാം. കഴിഞ്ഞ ദിവസം കൽപ്പാത്തിയിൽ എത്തിയ വിനായകന് ക്ഷേത്രത്തിൽ കയറാനും ഭഗവാനെ കാണാനും ഒരു മോഹം. സമയം രാത്രി 11 ആയി എങ്കിലും ഭഗവാനെ കണ്ടിട്ടേ മടങ്ങൂ എന്നായിരുന്നു നടന്റെ നിലപാട്. ക്ഷേത്ര ദർശനത്തിന്റെ സമയം അവസാനിച്ചുവെന്നും അതിനാൽ പിറ്റേന്ന് വരണം എന്നും ഭാരവാഹികളും നാട്ടുകാരും താരത്തോട് പറഞ്ഞു. എന്നാൽ പറ്റില്ലേ ഭഗവാനെ കണ്ടേ മടങ്ങൂ എന്നായി വിനായകൻ. താനെത്തിയത് ഭഗവാനെ കാണാൻ ആണെന്ന് നാട്ടുകാരെ തള്ളിമാറ്റാനും താരം ശ്രമിച്ചു. ഇതോടെ ഉന്തും തള്ളുമായി. ഇതിന്റെ ദൃശ്യങ്ങൾ സമൂഹ മാദ്ധ്യമങ്ങളിൽ വൈറലുമായി.
താരത്തിന്റെ ക്ഷേത്ര ദർശനം മുഖ്യധാര മാദ്ധ്യമങ്ങളിൽ വാർത്തയായി. സോഷ്യൽ മീഡിയയിൽ ചർച്ചയും കൊഴുത്തു. ഇതോടെയായിരുന്നു ഫേസ്ബുക്ക് കുറിപ്പുമായി പതിവ് പോലെ വിനായകൻ എത്തിയത്. അയ്യങ്കാളിയേയും അയ്യങ്കാറേയും തമ്മിൽ അടിപ്പിച്ച് ഇനിയും കുടുംബം പോറ്റാൻ നോക്കണ്ട.സർവ്വത്ര ശിവം എന്നായിരുന്നു നടൻ ഫേസ്ബുക്കിൽ കുറിച്ചത്. സംഭവത്തെ ജാതീയ വത്കരിച്ചുകൊണ്ടുള്ള പരാമർശത്തിൽ വലിയ പിന്തുണ ലഭിക്കുമെന്നായിരുന്നു വിനായകന്റെ പ്രതീക്ഷ. എന്നാൽ പിന്തുണ ലഭിച്ചില്ലെന്ന് മാത്രമല്ല സോഷ്യൽ മീഡിയയിൽ ചിരി പടർത്തിയ പോസ്റ്റ് അദ്ദേഹത്തിന് നിറയെ പരിഹാസ കമന്റുകളും വാങ്ങിക്കൊടുത്തു. കാര്യം അറിഞ്ഞവർ താരത്തിന്റെ രാത്രികാല ക്ഷേത്ര ദർശനത്തെ പരിഹസിച്ചെത്തിയപ്പോൾ എഴുത്തിന്റെ പൊരുൾ മനസിലാകത്തവർ അന്തിച്ചു നിന്നു.
ചിലരുടെ ചിന്തപോയത് മറ്റൊരു വഴിയ്ക്കാണ്. അടുത്തിടെ പുഴു എന്ന സിനിമയുടെ പേരിൽ ചർച്ചകൾക്ക് പാത്രമായ നടനിലേക്കും എത്തി ആളുകളുടെ ചിന്ത. ഹിന്ദുക്കളെ അങ്ങനെ തമ്മിൽ തല്ലിക്കേണ്ട എന്നാണോ നടൻ ഉദ്ദേശിച്ചത് എന്ന ചോദ്യമായി ആളുകളുടെ മനസിൽ. അങ്ങിനെ പല അർത്ഥതലങ്ങളിലേക്ക് സ്വന്തം പോസ്റ്റ് വഴിമാറിയതോടെ ഡിലീറ്റ് ചെയ്‌തേക്കാമെന്ന് തീരുമാനിക്കുകയായിരുന്നു വിനായകൻ. സർവ്വത്ര ശിവം.
