ന്യഡൽഹി: പ്രധാനമന്ത്രി നരേന്ദ്രമോദിയ്ക്ക് ഇന്ന് 74ാം ജന്മദിനം.എല്ലാവർഷത്തെയും പോലെ മോദിയുടെ ജന്മദിനം വിവിധ സേവന പ്രവർത്തനങ്ങൾ നടത്തി ആഘോഷമാക്കാനാണ് ബിജെപിയുടെ തീരുമാനം. ജന്മദിനം ഇക്കുറിയും രാജ്യവ്യാപകമായി ‘സേവ പർവ്’ ആയി ആചരിക്കാനാണ് തീരുമാനം. രക്തദാന ക്യാംപുകൾ, ശുചീകരണം, സൗജന്യ ഭക്ഷണവിതരണം തുടങ്ങിയ വിവിധ സേവന പ്രവർത്തനങ്ങൾ സേവാ പർവിൻ്റെ ഭാഗമായി ബിജെപി ആസൂത്രണം ചെയ്തിട്ടുണ്ട്.
ജന്മനാടായ ഗുജറാത്തിൽ മോദിയുടെ ജന്മദിനം വ്യത്യസ്തമായ പരിപാടികളോടെ ആഘോഷമാക്കാനാണ് തീരുമാനം. സൗജന്യ ഓട്ടോയാത്ര, കടകളിൽ ഡിസ്കൗണ്ട് തുടങ്ങിയവ ആസൂത്രണം ചെയ്യുന്നുണ്ട്. പ്രധാനമന്ത്രിയുടെ ജന്മദിനത്തിൽ സൂറത്തിലെ 2500 വ്യവസായികൾ 10 മുതൽ 100 ശതമാനം വരെ ഡിസ്കൗണ്ട് നൽകുമെന്ന് ബിജെപി നേതാവും എംഎൽഎയുമായ പൂ‍ർണേഷ് മോദി അറിയിച്ചു. 110 ഓട്ടോറിക്ഷ ഡ്രൈവർമാർ യാത്രകൾ സൗജന്യമായി നടത്തുമെന്നും അദ്ദേഹം പറഞ്ഞു.
പ്രധാനമന്ത്രിയുടെ ജന്മദിനത്തിൽ സൗജന്യ ഭക്ഷണവിതരണം നടത്തുമെന്ന് അജ്മീ‍ർ ഷരീഫ് ദർഗ പ്രഖ്യാപിച്ചു. അന്നേ ദിവസം 4,000 കിലോ വെജിറ്റേറിയൻ ഭക്ഷണം ലങ്കാ‍റിൽ (ഊട്ടുപുര) വിതരണം ചെയ്യും. ചോറ്, നെയ്യ്, ഡ്രൈ ഫ്രൂട്ട്സ് എന്നിവയാണ് വിതരണം ചെയ്യുക.
അതേസമയം ഇന്ന് ഒഡീഷയിലെത്തുന്ന പ്രധാനമന്ത്രി മോദി, വനിതകൾക്ക് 5 വർഷത്തേക്ക് അരലക്ഷം രൂപ നൽകുന്ന ‘സുഭദ്ര യോജന’ പദ്ധതികൾ പ്രഖ്യാപിക്കും.
ഗുജറാത്തിലെ മെഹ്സാന ജില്ലയിലുള്ള വാഡ്നഗറിൽ 1950 സെപ്റ്റംബർ 17നാണ് മോദിയുടെ ജനനം. ദാമോദർദാസ് മുൽഛന്ദ് മോദിയുടെയും ഹീരാബെൻ മോദിയുടെയും ആറു മക്കളിൽ മൂന്നാമനാണ് മോദി. എട്ടാം വയസ്സിൽ ആർഎസ്എസ് പ്രവർത്തകനായ മോദി, 1985ലാണ് ബിജെപിയിലേക്ക് എത്തുന്നത്.
