തിരുവനന്തപുരം : പാൽ വില ലിറ്ററിന് 4 രൂപ വർധിപ്പിക്കാൻ മിൽമ ഡയറക്ടർ ബോർഡ് യോഗം ശുപാർശ ചെയ്തു. നിലവിൽ ലോക്സഭാ തിരഞ്ഞെടുപ്പിന്റെ പെരുമാറ്റച്ചട്ടം നിലനിൽക്കുന്നതിനാൽ, ജൂൺ ആദ്യവാരത്തോടെ മാത്രമേ വില വർധനവ് സംബന്ധിച്ച ഔദ്യോഗിക പ്രഖ്യാപനം ഉണ്ടാകൂ. ഇന്ന് ചേര്ന്ന മിൽമ ഡയറക്ടർ ബോർഡ് യോഗത്തിലാണ് വില വര്ധന പരിഗണിച്ചത്. ലിറ്ററിന് നാല് രൂപ വരെ കൂട്ടാൻ സർക്കാർ അനുമതി നൽകിയ പശ്ചാത്തലത്തിലാണ് വില വർധനയ്ക്കള്ള നീക്കം തുടങ്ങിയത്.
കാലിത്തീറ്റയുടെ വിലയിലുണ്ടായ അമിതമായ വർധനവ് മൂലം കർഷകർ കടുത്ത പ്രതിസന്ധിയിലാണെന്നാണ് വിലവർധനവിന് കാരണമായി മിൽമ സൂചിപ്പിക്കുന്നത്. വർധിപ്പിക്കുന്ന തുകയുടെ സിംഹഭാഗവും കർഷകർക്ക് നേരിട്ട് ലഭ്യമാക്കാനാണ് ലക്ഷ്യമിടുന്നത് എന്നും മിൽമ വിശദീകരിച്ചു. നിലവിൽ നീല കവർ പാലിന് (ടോൺഡ് മിൽക്ക്) ലിറ്ററിന് 52 രൂപയാണ് വില. പുതിയ വർധനവ് വരുന്നതോടെ ഇത് 56 രൂപയായി ഉയരും. തൈര്, നെയ്യ് തുടങ്ങിയ മറ്റ് ഉൽപ്പന്നങ്ങളുടെ വിലയിലും മാറ്റമുണ്ടാകാൻ സാധ്യതയുണ്ട്.
