തലസ്ഥാനത്തെ രാംലീല മൈതാനത്ത് പ്രതിപക്ഷ സഖ്യമായ ‘ഇൻഡി’ (INDIA) മുന്നണി സംഘടിപ്പിച്ച മഹാറാലിക്കെതിരെ വൻ സാമ്പത്തിക നഷ്ടത്തിന്റെ കണക്കുകളുമായി ഡൽഹിയിലെ വ്യാപാരി സംഘടനകൾ. ഞായറാഴ്ച നടന്ന റാലിയെത്തുടർന്ന് ഡൽഹിയിലെ വ്യാപാര മേഖലയ്ക്ക് ഏകദേശം 10,000 കോടി മുതൽ 11,000 കോടി രൂപയുടെ വരെ വൻ നഷ്ടമുണ്ടായതായി ഡൽഹിയിലെ പ്രമുഖ വ്യാപാരി സംഘടനയായ ചേംബർ ഓഫ് ട്രേഡ് ആൻഡ് ഇൻഡസ്ട്രി (CTI) ആരോപിച്ചു.
രാംലീല മൈതാനത്തിനും സെൻട്രൽ ഡൽഹിക്കും സമീപമുള്ള 20 മുതൽ 25 വരെയുള്ള പ്രധാന മാർക്കറ്റുകളിലെ കച്ചവടത്തെ റാലി രൂക്ഷമായി ബാധിച്ചതായി സി.ടി.ഐ ചെയർമാൻ ബ്രിജേഷ് ഗോയൽ പറഞ്ഞു. മേഖലയിലെ ആകെ മൂന്ന് ലക്ഷത്തോളം കടകളിൽ രണ്ടര ലക്ഷത്തോളം കടകളും ഗതാഗത തടസ്സവും സുരക്ഷാ നിയന്ത്രണങ്ങളും കാരണം പൂർണ്ണമായും അടച്ചിടേണ്ടി വന്നു. ഞായറാഴ്ചകളിൽ സാധാരണയായി ഹരിയാന, ഉത്തർപ്രദേശ് തുടങ്ങിയ അയൽ സംസ്ഥാനങ്ങളിൽ നിന്നും വൻതോതിൽ ഉപഭോക്താക്കളും മൊത്തവ്യാപാരികളും ഡൽഹിയിലെ വിപണികളിൽ എത്താറുള്ളതാണ്. മൂന്ന് മുതൽ നാല് ലക്ഷം വരെ ആളുകൾ എത്തുന്നയിടത്ത് ഇത്തവണ ആളനക്കമില്ലാത്ത അവസ്ഥയായിരുന്നുവെന്നും അദ്ദേഹം വ്യക്തമാക്കി.
ചരക്കുനീക്കത്തെയും റാലി പൂർണ്ണമായി സ്തംഭിപ്പിച്ചു. വ്യവസായ മേഖലകളിൽ നിന്നും ട്രാൻസ്പോർട്ട് ഹബ്ബുകളിൽ നിന്നും ഓൾഡ് ഡൽഹിയിലെയും സെൻട്രൽ ഡൽഹിയിലെയും വിപണികളിലേക്ക് സാധനങ്ങൾ എത്തിക്കേണ്ട അയ്യായിരത്തോളം ചെറു ട്രക്കുകൾക്കും ടെമ്പോകൾക്കും നിരത്തിലിറങ്ങാൻ സാധിച്ചില്ല. ഇതുമൂലം കോടിക്കണക്കിന് രൂപയുടെ ചരക്കുകളാണ് വഴികളിൽ കുടുങ്ങിയത്. രാഷ്ട്രീയ റാലികൾ സംഘടിപ്പിക്കുമ്പോൾ സാധാരണക്കാരായ വ്യാപാരികളുടെ ജീവനമാർഗ്ഗം തടസ്സപ്പെടുത്തരുതെന്നും ഉണ്ടായ ഭീമമായ സാമ്പത്തിക നഷ്ടത്തിന് ആര് മറുപടി പറയുമെന്നും വ്യാപാരി സംഘടനകൾ ചോദിക്കുന്നു.
