കൊല്ലം: പതിനാറുകാരിയെ പീഡിപ്പിച്ച കേസിൽ അറസ്റ്റിലായ പ്രമുഖ യൂട്യൂബറും മതപാഠശാല ഡയറക്ടറുമായ മുഹമ്മദ്‌ നിയാസ് ജൗഹറി കൂടുതൽ പെൺകുട്ടികളെ ലൈംഗിക ചൂഷണത്തിനിരയാക്കിയിട്ടുണ്ടോ എന്നതിൽ അന്വേഷണം ഊർജ്ജിതമാക്കി പോലീസ്. ഓച്ചിറ മേമനയിൽ പ്രവർത്തിക്കുന്ന അൽ ഹബീബിയ ഇസ്‌ലാമിക് അക്കാദമി എന്ന സ്ഥാപനം കേന്ദ്രീകരിച്ചാണ് പ്രതി തട്ടിപ്പുകളും ചൂഷണങ്ങളും നടത്തിയിരുന്നത്. നിലവിൽ കോടതി റിമാൻഡ് ചെയ്ത പ്രതിയെ കൂടുതൽ ചോദ്യം ചെയ്യുന്നതിനായി കസ്റ്റഡിയിൽ വാങ്ങാൻ കരുനാഗപ്പള്ളി പോലീസ് ഉടൻ അപേക്ഷ നൽകും.
പെൺകുട്ടികളെ വലയിലാക്കാൻ പ്രതി ഉപയോഗിച്ച ഡിജിറ്റൽ തെളിവുകൾ ശേഖരിക്കുന്നതിന്റെ ഭാഗമായി ഇയാളുടെ മൊബൈൽ ഫോണും മറ്റ് ഇലക്ട്രോണിക് ഉപകരണങ്ങളും പിടിച്ചെടുത്തിട്ടുണ്ട്. ഇവ വിശദമായ ശാസ്ത്രീയ ഫോറൻസിക് പരിശോധനയ്ക്ക് വിധേയമാക്കാനാണ് പോലീസിന്റെ തീരുമാനം. സമാനമായ രീതിയിൽ കൂടുതൽ പെൺകുട്ടികൾ ഇയാളുടെ പീഡനത്തിനിരയായിട്ടുണ്ടോ എന്ന് കണ്ടെത്തുന്നതിനാണ് പരിശോധന.
ഇതിനുപുറമെ, ഇയാൾ നടത്തുന്ന അൽ ഹബീബിയ ഇസ്‌ലാമിക് അക്കാദമി കേന്ദ്രീകരിച്ച് ദുരൂഹ സാഹചര്യത്തിൽ കോടിക്കണക്കിന് രൂപയുടെ സാമ്പത്തിക ഇടപാടുകൾ നടന്നതായും പോലീസിന്റെ പ്രാഥമിക പരിശോധനയിൽ കണ്ടെത്തിയിട്ടുണ്ട്. രോഗശാന്തി ശുശ്രൂഷയുടെയും പ്രാർത്ഥനകളുടെയും മറവിൽ വ്യാജ പ്രചാരണങ്ങൾ നടത്തി വൻതുക തട്ടിയെടുത്തിട്ടുണ്ടോ എന്നതടക്കമുള്ള വിവരങ്ങളും അന്വേഷണ പരിധിയിൽ വരും. സ്ഥാപനത്തിന്റെ സാമ്പത്തിക ഉറവിടങ്ങളെക്കുറിച്ചും ട്രസ്റ്റ് രേഖകളെക്കുറിച്ചും പോലീസ് പ്രത്യേക അന്വേഷണം ആരംഭിച്ചിട്ടുണ്ട്.
