തിരുവനന്തപുരം : സംസ്ഥാന സർക്കാരിന്റെ ഇന്ദിര ഗ്യാരന്റി പദ്ധതിയുടെ ഭാഗമായി സ്ത്രീകൾക്കും ട്രാൻസ്‌ജെൻഡർ വ്യക്തികൾക്കുമായി പ്രഖ്യാപിച്ച ‘പ്രിയദർശിനി’ സൗജന്യ യാത്രാ പദ്ധതി ജൂൺ 15 മുതൽ പ്രാബല്യത്തിൽ വരും. സൗജന്യ യാത്ര അനുവദിക്കുന്ന ഓർഡിനറി ബസുകളുടെ ഉപവിഭാഗങ്ങളുടെ പട്ടിക കെഎസ്ആർടിസി ഔദ്യോഗികമായി പുറത്തിറക്കി.
ഓർഡിനറി ഫെയർ സ്റ്റേജ് ഘടനയിലുള്ള ഏഴ് പ്രധാന വിഭാഗം ബസുകളിലാണ് സ്ത്രീകൾക്ക് ഇനി മുതൽ പൂർണ്ണമായും സൗജന്യമായി യാത്ര ചെയ്യാൻ സാധിക്കുക. യാത്രക്കാർക്ക് എളുപ്പത്തിൽ തിരിച്ചറിയാനായി സൗജന്യ യാത്രാ സൗകര്യമുള്ള ഈ ബസുകളിൽ ‘പ്രിയദർശിനി’ എന്ന പ്രത്യേക സ്റ്റിക്കർ പതിക്കുന്നതായിരിക്കും.
സ്ത്രീകൾക്ക് സൗജന്യ യാത്ര അനുവദിക്കപ്പെടുന്ന 7 വിഭാഗം ബസുകൾ ഇവയാണ്,
1. സാധാരണ ഓർഡിനറി സർവീസുകൾ.
2. സിറ്റി ഓർഡിനറി ബസുകൾ.
3. ലിമിറ്റഡ് സ്റ്റോപ്പ് ഓർഡിനറി സർവീസ്.
4. ടൗൺ ടു ടൗൺ ബസുകൾ.
5. ഫെയർ സ്റ്റേജ് ലിമിറ്റഡ് സ്റ്റോപ്പ് ഓർഡിനറി
6. പോയിന്റ് ടു പോയിന്റ് ഓർഡിനറി സർവീസ്
7. ഗ്രാമവണ്ടി സർവീസുകൾ.
ജൂൺ 15-ന് രാവിലെ 8:30-ന് തമ്പാനൂർ ബസ് ടെർമിനലിൽ വെച്ച് മുഖ്യമന്ത്രി വി. ഡി. സതീശൻ പദ്ധതി ഉദ്ഘാടനം ചെയ്യും.
സിറ്റി ഫാസ്റ്റ്, ഫാസ്റ്റ് പാസഞ്ചർ, സൂപ്പർഫാസ്റ്റ് ഉൾപ്പെടെയുള്ള മറ്റ് മുകളിലോട്ടുള്ള എല്ലാ സൂപ്പർ ക്ലാസ് സർവീസുകളിലും,
കെ-സ്വിഫ്റ്റ് ബസുകളിലും സൗജന്യ യാത്ര ലഭിക്കില്ല. കൂടാതെ ഉത്സവകാല സ്‌പെഷ്യൽ സർവീസുകൾ, വരാന്ത്യ അധിക സർവീസുകൾ, ബി.ടി.സി സർവീസുകൾ, ചാർട്ടേഡ് ട്രിപ്പുകൾ എന്നിവയിലും ഈ ആനുകൂല്യം ഉണ്ടായിരിക്കുന്നതല്ല. പ്രതിദിനം എത്ര സ്ത്രീകൾ ഈ പദ്ധതി ഉപയോഗപ്പെടുത്തുന്നുണ്ടെന്ന് കൃത്യമായി കണക്കാക്കാനും യാത്രാച്ചെലവുകൾ തിട്ടപ്പെടുത്താനുമായി കണ്ടക്ടർമാർ യാത്രക്കാർക്ക് തുക ഈടാക്കാതെ ‘സീറോ ടിക്കറ്റ്’ വിതരണം ചെയ്യും.
