‘ചികിത്സ കഴിഞ്ഞിട്ടും നടുവേദന വീണ്ടും വരുന്നോ?’: നമ്മൾ വരുത്തുന്ന ഈ വലിയ തെറ്റാണ് കാരണം

ചികിത്സകൾക്കും മരുന്നുകൾക്കും ശേഷം നടുവേദനയ്ക്ക് താൽക്കാലിക ശമനം ലഭിക്കാറുണ്ടെങ്കിലും, കുറച്ചു ദിവസങ്ങൾക്ക് ശേഷം വേദന വീണ്ടും വരുന്നത് പലരെയും അലട്ടുന്ന വലിയൊരു പ്രശ്നമാണ്. എന്നാൽ വേദന കുറഞ്ഞു എന്നതുകൊണ്ട് മാത്രം നട്ടെല്ല് പൂർണ്ണമായും ആരോഗ്യകരമായ അവസ്ഥയിലായി എന്ന് കരുതാൻ കഴിയില്ല. നട്ടെല്ലിന് താങ്ങാവേണ്ട പേശികളും ചലനശേഷിയും പൂർവ്വസ്ഥിതിയിലാകാത്തതാണ് നടുവേദന വിടാതെ പിന്തുടരുന്നതിന് പിന്നിലെ പ്രധാന കാരണമെന്ന് ആരോഗ്യ വിദഗ്ധർ ചൂണ്ടിക്കാണിക്കുന്നു.

ഡൽഹി ഐഎസ്ഐസി മൾട്ടിസ്പെഷ്യാലിറ്റി ഹോസ്പിറ്റലിലെ സ്പൈൻ സർവീസസ് ചീഫും ഡയറക്ടറുമായ ഡോ. കാളിദത്ത ദാസിന്റെ അഭിപ്രായത്തിൽ, നടുവേദന മാറിയ ശേഷമുള്ള പുനരധിവാസവും (റീഹാബിലിറ്റേഷൻ) വ്യായാമങ്ങളുമാണ് ഭാവിയിൽ വേദന വീണ്ടും വരാതിരിക്കാൻ ഏറ്റവും പ്രധാനം. മരുന്നുകളോ സർജറിയോ പരാജയപ്പെട്ടതുകൊണ്ടല്ല പലപ്പോഴും വേദന തിരിച്ചുവരുന്നത്. പരിക്കുകൾക്കോ സർജറിക്കോ അല്ലെങ്കിൽ വിശ്രമത്തിനോ ശേഷം നട്ടെല്ലിന് ചുറ്റുമുള്ള പേശികൾക്ക് ബലക്ഷയവും വലിവും (stiffness) അനുഭവപ്പെടാം. ഇവയെ കൃത്യമായ ഫിസിയോതെറാപ്പിയിലൂടെയും വ്യായാമങ്ങളിലൂടെയും ശക്തമാക്കാതിരുന്നാൽ, ദൈനംദിന ജോലികൾ ചെയ്യുമ്പോൾ നട്ടെല്ലിൽ വീണ്ടും അമിത സമ്മർദ്ദം അനുഭവപ്പെടുകയും വേദന തിരിച്ചെത്തുകയും ചെയ്യും.

വ്യക്തികളുടെ ആരോഗ്യസ്ഥിതിക്ക് അനുസരിച്ച് സ്ട്രെച്ചിംഗ്, സ്ട്രെങ്തനിംഗ് വ്യായാമങ്ങൾ, ശരിയായ രീതിയിൽ ഇരിക്കാനും നിൽക്കാനും നിവരാനുമുള്ള ട്രെയിനിംഗ് എന്നിവ റീഹാബിലിറ്റേഷനിൽ ഉൾപ്പെടുന്നു. ഭാരമുള്ള വസ്തുക്കൾ ഉയർത്തുക, കുനിയുക, കിടക്കയിൽ നിന്ന് എഴുന്നേൽക്കുക തുടങ്ങിയ കാര്യങ്ങൾ നട്ടെല്ലിന് ആയാസമില്ലാതെ എങ്ങനെ ചെയ്യാമെന്ന് ഫിസിയോതെറാപ്പിയിലൂടെ മനസ്സിലാക്കാം. ഡോക്ടറുടെയോ ഫിസിയോതെറാപ്പിസ്റ്റിന്റെയോ നിർദ്ദേശപ്രകാരം മാത്രം വേണം ഇത്തരം വ്യായാമങ്ങൾ ചെയ്യാൻ.

വേദന മാറിയാലും നട്ടെല്ലിന്റെ ആരോഗ്യം നിലനിർത്താൻ ദൈനംദിന ശീലങ്ങളിൽ ചില മാറ്റങ്ങൾ വരുത്തേണ്ടതുണ്ട്. സ്ഥിരമായി ഒരേ ഇരുപ്പ് തുടരാതെ ഇടവേളകളിൽ നടക്കുകയോ ശരീരം അനക്കുകയോ ചെയ്യുക, ശരിയായ രീതിയിലുള്ള കസേരകളും വർക്ക്സ്റ്റേഷനുകളും ഉപയോഗിക്കുക, വ്യായാമങ്ങൾ മുടക്കാതിരിക്കുക എന്നിവ വളരെ പ്രധാനമാണ്. എന്നാൽ, നടുവേദനയ്‌ക്കൊപ്പം കാലുകളിൽ കഠിനമായ തരിപ്പോ ബലക്ഷയമോ അനുഭവപ്പെടുക, മൂത്രമൊഴിക്കുന്നതിനോ മലവിസർജ്ജനത്തിനോ നിയന്ത്രണമില്ലാതാവുക തുടങ്ങിയ ലക്ഷണങ്ങൾ കണ്ടാൽ ഒട്ടും വൈകാതെ അടിയന്തിരമായി വൈദ്യസഹായം തേടേണ്ടതുണ്ട്. കേവലം വേദന ഇല്ലാതാക്കുക എന്നതിനപ്പുറം, നട്ടെല്ലിന്റെ പ്രവർത്തനക്ഷമതയും പേശികളുടെ ബലവും വീണ്ടെടുത്ത് ആത്മവിശ്വാസത്തോടെ ദൈനംദിന ജീവിതത്തിലേക്ക് മടങ്ങുകയാണ് നടുവേദന ചികിത്സയുടെ പ്രധാന ലക്ഷ്യം.