ഉപ്പിലിട്ട നെല്ലിക്കയും നെല്ലിക്ക അച്ചാറുമൊക്കെ ഓർക്കുമ്പോൾ തന്നെ മലയാളികളുടെ വായിൽ കപ്പലോടിക്കാനുള്ള വെള്ളം വരും. കുട്ടിക്കാലത്ത് ഉപ്പും മുളകും കൂട്ടി നെല്ലിക്ക കഴിച്ച ഓർമ്മകൾ ഇല്ലാത്തവരും ചുരുക്കമാണ്. എന്നാൽ നമ്മുടെ തൊടിയിൽ വെറുതെ വീണുകിടക്കുന്ന ഈ കൊച്ചു നെല്ലിക്ക ലോകമറിയുന്ന ഒരു ‘സൂപ്പർ ഫുഡ്’ ആണെന്ന് പറഞ്ഞാൽ വിശ്വസിക്കുമോ? സംശയിക്കേണ്ട, സാക്ഷാൽ പ്രധാനമന്ത്രി നരേന്ദ്ര മോദി തന്നെയാണ് തന്റെ 138-ാമത് ‘മൻ കി ബാത്ത്’ പരിപാടിയിലൂടെ ഈ ഇന്ത്യൻ സൂപ്പർ ഫുഡിന്റെ ഗുണഗണങ്ങൾ രാജ്യത്തിന് മുന്നിൽ വീണ്ടും അവതരിപ്പിച്ചത്. മസൈദാർ ഭി, ഹെൽത്തി ഭി” (രുചികരവും ആരോഗ്യകരവും) എന്നാണ് പ്രധാനമന്ത്രി നെല്ലിക്കയെ വിശേഷിപ്പിച്ചത്.
രോഗപ്രതിരോധശേഷി വർധിപ്പിക്കുന്നതിലും ചർമ്മത്തിന്റെ യുവത്വം കാത്തുസൂക്ഷിക്കുന്നതിലും ആയുർവേദത്തിലും ആധുനിക വൈദ്യശാസ്ത്രത്തിലും ഒരുപോലെ മുൻനിരയിലാണ് നെല്ലിക്ക അഥവാ ഇന്ത്യൻ ഗൂസ്ബെറി. ഓറഞ്ചിനെക്കാൾ എത്രയോ ഇരട്ടി വിറ്റാമിൻ സി അടങ്ങിയിട്ടുള്ള ഈ കൊച്ചുകായ് ആരോഗ്യത്തിന്റെ കാര്യത്തിൽ ഒരു വലിയ അത്ഭുതം തന്നെയാണ്. ദിവസവും ഒരെണ്ണം ശീലമാക്കിയാൽ അത് ശരീരത്തിന് നൽകുന്ന ഗുണങ്ങൾ ചെറുതൊന്നുമല്ല.
ആന്റിഓക്സിഡന്റുകളും പോളിഫെനോളുകളും ഡയറ്ററി ഫൈബറുകളുംയാൽ സമ്പന്നമായ നെല്ലിക്ക ഫ്രീ റാഡിക്കലുകളെ നിർവീര്യമാക്കി കോശങ്ങളെ സംരക്ഷിക്കുന്നു. ഇത് ശരീരത്തിലെ ചീത്ത കൊളസ്ട്രോൾ (LDL) കുറയ്ക്കാനും നല്ല കൊളസ്ട്രോൾ (HDL) നിലനിർത്താനും സഹായിക്കുന്നതിലൂടെ ഹൃദയാരോഗ്യം സുരക്ഷിതമാക്കുന്നു. കൂടാതെ ഇതിലടങ്ങിയിരിക്കുന്ന ക്രോമിയം ഇൻസുലിൻ ഉൽപാദനത്തെ ഉത്തേജിപ്പിച്ച് രക്തത്തിലെ പഞ്ചസാരയുടെ അളവ് കൃത്യമായി നിയന്ത്രിക്കാൻ പ്രമേഹരോഗികൾക്കും തുണയാകുന്നു.
ദഹനപ്രക്രിയ സുഗമമാക്കാനും മലബന്ധം പോലുള്ള ഉദരപ്രശ്നങ്ങൾ അകറ്റാനും നാരുകളാൽ സമ്പന്നമായ നെല്ലിക്കയ്ക്ക് പ്രത്യേക കഴിവുണ്ട്. കാഴ്ചശക്തി വർധിപ്പിക്കുന്നതിനും കണ്ണിന്റെ ആരോഗ്യത്തിനും ഇതിലുള്ള വിറ്റാമിൻ എ അത്യന്താപേക്ഷിതമാണ്. മുടിയിഴകൾക്ക് കരുത്ത് പകരാനും അകാലത്തിലുള്ള നരയും മുടി കൊഴിച്ചിലും തടയാനും നെല്ലിക്ക പതിവായി കഴിക്കുന്നതിലൂടെ സാധിക്കും.
എന്നാൽ ആരോഗ്യ ഗുണങ്ങൾ ഏറെയുണ്ടെങ്കിലും നെല്ലിക്ക എല്ലാവർക്കും ഒരുപോലെ അനുയോജ്യമാകണമെന്നില്ല. കടുത്ത അസിഡിറ്റിയോ ഗ്യാസ്ട്രൈറ്റിസോ ഉള്ളവർ വെറുംവയറ്റിൽ നെല്ലിക്ക കഴിക്കുന്നത് നെഞ്ചെരിച്ചിലും വയറുവേദനയും കൂട്ടാൻ ഇടയാക്കും. അതുപോലെ സ്വാഭാവികമായി രക്തം കട്ടി കുറയ്ക്കാൻ ശേഷിയുള്ളതിനാൽ രക്തം കട്ടപിടിക്കുന്നത് തടയാനുള്ള മരുന്നുകൾ കഴിക്കുന്നവരും ശസ്ത്രക്രിയയ്ക്ക് വിധേയരാകുന്നവരും ഡോക്ടറുടെ നിർദ്ദേശപ്രകാരം മാത്രം ഇത് ഭക്ഷണത്തിൽ ഉൾപ്പെടുത്തുക. ശരീരപ്രകൃതിയും ആരോഗ്യസ്ഥിതിയും അറിഞ്ഞ് മിതമായ അളവിൽ നെല്ലിക്ക ശീലമാക്കിയാൽ അത് നിങ്ങളുടെ ആയുസ്സും ആരോഗ്യവും വർധിപ്പിക്കുമെന്ന കാര്യത്തിൽ സംശയമില്ല.
