കൊച്ചി: വാക്സിനേഷൻ പൂർത്തിയാക്കിയവർക്ക് വീണ്ടും വാക്സിൻ നൽകില്ലെന്ന് കേന്ദ്ര സർക്കാർ കേരള ഹൈക്കോടതിയിൽ അറിയിച്ചു. രണ്ട് ഡോസ് കൊവാക്സിൻ സ്വീകരിച്ച കണ്ണൂർ സ്വദേശി കൊവിഷീൽഡ് വാക്സിൻ വേണമെന്ന് ആവശ്യപ്പെട്ട് ഹൈക്കോടതിയെ സമീപിച്ചിരുന്നു. ഇയാൾ ജോലി ചെയ്യുന്ന സൗദി അറേബ്യ കൊവാക്സിന് അംഗീകാരം നൽകിയിരുന്നില്ല. ഈ സാഹചര്യത്തിലായിരുന്നു ഇയാൾ കോടതിയെ സമീപിച്ചത്.
രണ്ടിൽ കൂടുതൽ വാക്സിനുകൾ എടുത്താൽ ആരോഗ്യ പ്രശ്നങ്ങൾ ഉണ്ടാകാൻ സാധ്യതയുണ്ട്. ഇത്തരത്തിൽ വീണ്ടും വാക്സിൻ നൽകാൻ അന്താരാഷ്ട്ര മാർഗ്ഗരേഖ അനുവദിക്കുന്നില്ലെന്നും സർക്കാർ അറിയിച്ചു. ഈ വിഷയത്തിൽ കൂടുതൽ പഠനങ്ങൾ നടന്നിട്ടില്ല.
ഈ സാഹചര്യത്തിൽ പരാതിക്കരന്റെ ആവശ്യം അംഗീകരിക്കാനാവില്ല. ഇത് അംഗീകരിച്ച് കൊടുത്താൽ നിരവധി ആളുകൾ ഇത്തരം ആവശ്യങ്ങളുമായി മുന്നോട്ട് വരാൻ സാധ്യതയുണ്ടെന്നും സർക്കാർ കോടതിയെ അറിയിച്ചു.
