ഡൽഹി: രാജ്യത്തെ സാമ്പത്തിക വളർച്ചാ നിരക്ക് 8 ശതമാനത്തിന് മുകളിലെന്ന് പ്രധാനമന്ത്രി നരേന്ദ്ര മോദി. വിദേശ നിക്ഷേപം, വിദേശ വിനിമയം, ജിഎസ്ടി കളക്ഷൻ എന്നിവയും റെക്കോർഡ് ഉയരങ്ങളിൽ എത്തി എന്നും പ്രധാനമന്ത്രി പറഞ്ഞു. പ്രധാനമന്ത്രി കിസാൻ പദ്ധതിയുടെ പത്താം ഗഡു വിതരണം ഉദ്ഘാടനം ചെയ്യവെയാണ് അദ്ദേഹം ഇക്കാര്യങ്ങൾ വ്യക്തമാക്കിയത്.
കാർഷിക രംഗത്തും കയറ്റുമതി രംഗത്തും രാജ്യം പുത്തൻ കുതിപ്പ് നടത്തുകയാണ്. രാജ്യം സ്വാതന്ത്ര്യത്തിന്റെ 75ആം വാർഷികം ആഘോഷിക്കുന്ന ഈ വർഷത്തിൽ ആവേശകരമായ ഒരു പുതിയ യാത്രക്ക് തുടക്കം കുറിക്കാമെന്നും പ്രധാനമന്ത്രി പറഞ്ഞു. മുൻ വർഷങ്ങളിൽ നിന്നും പ്രചോദനം ഉൾക്കൊണ്ടു കൊണ്ട് നാം ഇന്ന് ഒരു പുതിയ തുടക്കം കുറിക്കുകയാണെന്നും അദ്ദേഹം പറഞ്ഞു.
