ന്യൂഡെല്‍ഹി: ഇന്ത്യന്‍ ഭരണഘടനയുടെ ശില്‍പ്പി ബി ആര്‍ അംബേദ്കറിന്റെ
66-ാം ചരമവാര്‍ഷിക ദിനത്തില്‍ പ്രധാനമന്ത്രി നരേന്ദ്ര മോദി ആദരാജ്ഞലി അര്‍പ്പിച്ചു. പ്രസിഡന്റ് ദ്രൗപതി മുര്‍മു, വൈസ് പ്രസിഡന്റ് ജഗ്ദീപ് ധന്‍കര്‍ എന്നിവര്‍ക്കൊപ്പം പാര്‍ലമെന്റ് സമുച്ചയത്തില്‍ അദ്ദേഹത്തിനായി പുഷ്പാര്‍ച്ചന നടത്തി.
ബി ആര്‍ അംബേദ്കറുടെ പോരാട്ടങ്ങള്‍ ദശലക്ഷക്കണക്കിന് ആളുകള്‍ക്ക് പ്രതീക്ഷ നല്‍കിയെന്നു പറഞ്ഞ പ്രധാനമന്ത്രി ഇന്ത്യക്കായി ഇത്രയും ബൃഹത്തായ ഭരണഘടന സൃഷ്ടിച്ചതിന്റെ നന്ദി രേഖപ്പെടുത്തുകയും ചെയ്തു. ” അംബേദ്കറുടെ ചരമവാര്‍ഷിക ദിനത്തില്‍ ആദരാജ്ഞലി അര്‍പ്പിക്കുന്നതിനൊപ്പം അദ്ദേഹം രാജ്യത്തിന് നല്‍കിയ മാതൃകാപരമായ സേവനങ്ങള്‍ അനുസ്മരിക്കുകയും ചെയ്യുന്നു. അദ്ദേഹത്തിന്റെ പോരാട്ടങ്ങള്‍ ദശലക്ഷത്തോളം ജനങ്ങള്‍ക്ക് പ്രതീക്ഷയേകി. ഇന്ത്യയ്ക്ക് ഇത്രയും വിപുലമായ ഒരു ഭരണഘടന നല്‍കാനുള്ള അദ്ദേഹത്തിന്റെ ശ്രമങ്ങള്‍ ഒരിക്കലും വിസ്മരിക്കാനാവില്ല’, പ്രധാനമന്ത്രി ട്വീറ്ററില്‍ പങ്കുവെച്ച കുറിപ്പിലൂടെ വ്യക്തമാക്കി.
