ജയ്പൂർ: മോഹൻലാലിനെ നായകനാക്കി ലിജോ ജോസ് പല്ലിശ്ശേരി സംവിധാനം ചെയ്യുന്ന ചിത്രം ‘മലൈക്കോട്ടൈ വാലിബൻ‘ രാജസ്ഥാനിൽ ആരംഭിച്ചു. ചിത്രത്തിന്റെ പൂജയുടെയും സ്വിച്ചോൺ കർമത്തിന്റെയും ചിത്രങ്ങൾ മോഹൻലാൽ സാമൂഹിക മാദ്ധ്യമങ്ങളിലൂടെ പുറത്ത് വിട്ടു. ‘മലൈക്കോട്ടൈ വാലിബന് വേണ്ടി കണ്ണും കാതും തുറന്നിരിക്കുന്ന ഏവർക്കുമായി, ഞങ്ങൾ ഇന്ന് മുതൽ തുടങ്ങുന്നു‘ എന്ന തലക്കെട്ടോടെയാണ്` മോഹൻലാൽ ചിത്രങ്ങൾ പങ്കുവെച്ചിരിക്കുന്നത്.
ചിത്രം ജനുവരി 18ന് ആരംഭിക്കുമെന്ന് നേരത്തേ തന്നെ അണിയറ പ്രവർത്തകർ വ്യക്തമാക്കിയിരുന്നു. സമകാലിക മലയാള സിനിമയിലെ ഏറ്റവും മികച്ച ക്രാഫ്റ്റ്സ്മാൻ എന്ന വിശേഷണമുള്ള ലിജോ ജോസ് പല്ലിശ്ശേരിയും മലയാളത്തിലെ ഏറ്റവും താരമൂല്യമുള്ള നടനായ മോഹൻലാലും ആദ്യമായി ഒന്നിക്കുന്നു എന്നതിന്റെ പേരിൽ പ്രഖ്യാപനം മുതൽ തന്നെ ശ്രദ്ധേയമായ ചിത്രമാണ് മലൈക്കോട്ടൈ വാലിബൻ.
അരങ്ങിലും അണിയറയിലും പ്രഗത്ഭരുടെ നീണ്ട നിരയാണ് മലൈക്കോട്ടൈ വാലിബന് വേണ്ടി ഒരുമിക്കുന്നത്. ആമേൻ എന്ന ചിത്രത്തിലൂടെ ശ്രദ്ധേയനായ പി എസ് റഫീക്കാണ് മലൈക്കോട്ടൈ വാലിബന്റെ തിരക്കഥ രചിച്ചിരിക്കുന്നത്. ചുരുളിയുടെ ഛായാഗ്രാഹകൻ മധു നീലകണ്ഠനാണ് ചിത്രത്തിന്റെ ക്യാമറ കൈകാര്യം ചെയ്യുന്നത്. കെഹിഎഫ്, കാന്താര തുടങ്ങിയ ചിത്രങ്ങളുടെ സംഘട്ടന സംവിധായകൻ വിക്രം മോർ ആണ് ചിത്രത്തിലെ സംഘട്ടന രംഗങ്ങൾ കൈകാര്യം ചെയ്യുന്നത്.
സ്വാതന്ത്ര്യം അർദ്ധരാത്രിയിൽ, അജഗജാന്തരം തുടങ്ങിയ ചിത്രങ്ങൾ സംവിധാനം ചെയ്ത ടിനു പാപ്പച്ചൻ, മലൈക്കോട്ടൈ വാലിബന്റെ അണിയറയിൽ പ്രവർത്തിക്കുന്നു എന്ന വാർത്തകളും നേരത്തേ പുറത്ത് വന്നിരുന്നു. ഷിബു ബേബി ജോണിന്റെ ജോൺ ആൻഡ് മേരി ക്രിയേറ്റീവിനൊപ്പം മാക്സ് ലാബ് സിനിമാസ്, സെഞ്ച്വറി ഫിലിംസ് എന്നിവർ ചേർന്നാണ് ചിത്രം നിർമ്മിക്കുന്നത്. മമ്മൂട്ടി ചിത്രം നൻപകൽ നേരത്ത് മയക്കത്തിന്റെ പ്രൊമോഷനിൽ പങ്കെടുക്കാതെയാണ് എൽജെപി മലൈക്കോട്ടൈ വാലിബന് വേണ്ടി രാജസ്ഥാനിൽ എത്തിയിരിക്കുന്നത് എന്നതും ശ്രദ്ധേയമാണ്.
