ന്യൂഡൽഹി : നരേന്ദ്ര മോദി മൂന്നാം തവണയും പ്രധാനമന്ത്രിയാകുമെന്നും വലിയ കാര്യങ്ങൾ ചെയ്യുമെന്നും ഹിന്ദു മത ഗുരു രാമഭദ്രാചാര്യ. അദ്ദേഹത്തിന്റെ പ്രവചനത്തിന്റെ വീഡിയോ ഇപ്പോൾ സോഷ്യൽ മീഡിയയിൽ വൈറലായിരിക്കുകയാണ്.
”നിങ്ങളുടെ നിയന്ത്രണത്തിലുള്ളതെല്ലാം നിങ്ങൾ ചെയ്തുകഴിഞ്ഞു. ഒന്നും ബാക്കിയില്ല. പത്മവിഭൂഷൺ പോലുള്ള പുരസ്‌കാരം നൽകി ബിജെപി എന്റെ യോഗ്യതയെ മാനിച്ചു. മോദി മൂന്നാം തവണയും വരും, ഇത്തവണയും വലിയ മാറ്റങ്ങൾ സംഭവിക്കും എന്ന് ഞാൻ വീണ്ടും പ്രവചിക്കുന്നു. ഗോവധം അവസാനിപ്പിക്കുകയും ഹിന്ദിയെ ദേശീയ ഭാഷയാക്കുകയും ചെയ്യണം” ഗുരു രാംഭദ്രാചാര്യ പറഞ്ഞു
രാമചരിതമനസ് നിരോധിക്കണമെന്ന് ആവശ്യപ്പെട്ട സമാജ് വാദി നേതാവ് സ്വാമി പ്രസാദ് മൗര്യയെ അദ്ദേഹം വിമർശിച്ചു. രാമചരിതമനസ് നിരോധിക്കണമെന്ന ആവശ്യം ഉന്നയിക്കുന്നവൻ വിഡ്ഢിയായ നേതാവാണ്. സ്വാമി പ്രസാദ് മൗര്യ ധാർഷ്ട്യമുള്ള ആളായി മാറിയിരിക്കുന്നു.
ബീഹാറിലെ വിദ്യാഭ്യാസ മന്ത്രി ചന്ദ്രശേഖറിനെയും അദ്ദേഹം വെല്ലുവിളിച്ചു. ”ഞാൻ നിങ്ങളെ പരസ്യമായി വെല്ലുവിളിക്കുന്നു. എന്റെ മുന്നിൽ വന്ന് ഞാനുമായി ചർച്ച ചെയ്യൂ. ഏതൊക്കെ പേജുകളെക്കുറിച്ചും നിങ്ങൾക്ക് എതിർപ്പുണ്ടെങ്കിലും ഞാൻ പരിഹരിക്കും.”- അദ്ദേഹം പറയുന്നു.
വിലകുറഞ്ഞ ജനപ്രീതിക്കും ഹിന്ദുക്കളെ ഭിന്നിപ്പിക്കാനുമാണ് ഹിന്ദു വിരുദ്ധ പ്രസ്താവനകൾ ചിലർ നടത്തുന്നതെന്ന് രാമചരിതമനസ് വിവാദത്തെക്കുറിച്ച് ഗുരു രാമഭദ്രാചാര്യ പറഞ്ഞിരുന്നു. സ്വാമി പ്രസാദ് മൗര്യയെ അറസ്റ്റ് ചെയ്യുകയും കഠിനമായ ശിക്ഷ നൽകുകയും വേണമെന്നും അദ്ദേഹം ആവശ്യപ്പെട്ടു.
