ബംഗളൂരു; മുൻ മുഖ്യമന്ത്രിയും പ്രതിപക്ഷ നേതാവുമായ സിദ്ധരാമയ്യ കർമാടക മുഖ്യമന്ത്രി പദത്തിലെത്തുമെന്ന് റിപ്പോർട്ട്. 85 എംഎൽഎമാരുടെ പിന്തുണ സിദ്ധരാമയ്യയെ പിന്തുണയ്ക്കുന്നുണ്ടെന്നും 45 എംഎൽഎമാർ മാത്രമാണ് പിസിസി പ്രസിഡന്റ് ഡികെ ശിവകുമാറിന് പിന്തുണ നൽകിയതെന്നും നിരീക്ഷകർ ഹൈക്കമാൻഡിനെ അറിയിച്ചിരുന്നു. 6 പേർ മാത്രമാണ് ഹൈക്കമാൻഡ് കാര്യങ്ങൾ തീരുമാനിക്കട്ടെയെന്ന് പറഞ്ഞത്.
ഇതിന് പിന്നാലെയാണ് മുഖ്യമന്ത്രി പദം സിദ്ധരാമയ്യയ്ക്ക് തന്നെ നൽകാൻ കോൺഗ്രസ് ഹൈക്കമാൻഡ് നൽകാൻ തീരുമാനിച്ചതെന്നാണ് വിവരം.വേവലാതി വേണ്ടെന്നും വേഗത്തിൽ തീരുമാനമുണ്ടാകുമെന്നും സംഘടന ജനറൽ സെക്രട്ടറി കെ.സി വേണുഗോപാൽ പറഞ്ഞു. എന്നാൽ ഇന്ന് മുഖ്യമന്ത്രി ആരെന്ന പ്രഖ്യാപനം ഉണ്ടാവില്ലെന്നാണ് വിവരം.
മുഖ്യമന്ത്രി സ്ഥാനത്തിനായി പോര് മുറുകുന്നതിനിടെ സിദ്ധരാമയ്യ ഡൽഹിയിലെത്തിയിരുന്നു. വയറിന്റെ അസുഖം കാരണം ഡൽഹി യാത്ര മാറ്റിവച്ചെന്നാണ് ഡികെ ശിവകുമാർ വ്യക്തമാക്കിയത്.
അതേസമയം തനിക്ക് ഉപമുഖ്യമന്ത്രിയാകാൻ താൽപര്യമുണ്ടെന്ന് പറഞ്ഞ എംബി പാട്ടീൽ മുഖ്യമന്ത്രി പദത്തിൽ അന്തിമ തീരുമാനം കോൺഗ്രസ് അദ്ധ്യക്ഷന്റെതെന്ന് വ്യക്തമാക്കി.അന്തിമ തീരുമാനത്തിന് മുമ്പ് രാഹുൽ ഗാന്ധിയും സോണിയ ഗാന്ധിയുമായും മല്ലികാർജ്ജുൻ ഖാർഗെ ആശയവിനിമയം നടത്തും.
