പത്തനംതിട്ട; വനിതാ സംവരണ ബിൽ പാസാക്കിയ സന്തോഷം സഹപ്രവർത്തകരുമായി പങ്കുവെച്ച് എൻജിഒ സംഘ് വനിതാ ജീവനക്കാർ. പത്തനംതിട്ട കളക്ടറേറ്റിലാണ് വനിതാ ജീവനക്കാർ മധുരവിതരണം നടത്തിയത്. ജില്ലാ കളക്ടർ ദിവ്യ എസ് അയ്യരുടെ ചേമ്പറിൽ ഉൾപ്പെടെ ജീവനക്കാർ മധുരവുമായി എത്തി.
വനിതാ സംവരണ ബില്ല് സ്ത്രീകൾക്ക് മാത്രമായി നൽകുന്ന ഉത്തരവാദിത്വങ്ങൾ അല്ലെന്നും സാമൂഹ്യ പുരോഗതിക്കായി ഒരുമിച്ച് പ്രവർത്തിക്കുകയെന്നതാണ് അത് നൽകുന്ന സന്ദേശമെന്നും കളക്ടർ പറഞ്ഞു. നരേന്ദ്രമോദി സർക്കാരിന് അഭിവാദ്യങ്ങൾ അർപ്പിച്ചുകൊണ്ടായിരുന്നു എൻജിഒ സംഘ് പത്തനംതിട്ട ജില്ലാ വനിതാ കമ്മിറ്റിയുടെ നേതൃത്വത്തിൽ സർക്കാർ ഓഫീസുകളിൽ മധുര വിതരണം നടത്തിയത്.
എൻജിഒ സംഘ് വനിതാ വിഭാഗം സംസ്ഥാന സെക്രട്ടറി സിന്ധുമോൾ പിസി, ജില്ലാ പ്രസിഡന്റ് അനുപമ അരവിന്ദ്, ജില്ലാ സെക്രട്ടറി ആരതി ആർ, ജോയിന്റ് സെക്രട്ടറിമാരായ വിദ്യ വിപി, ജയശ്രീ എന്നിവർ നേതൃത്വം നൽകി.
