പഠനത്തിനായി അതിർത്തി കടന്നെത്തുന്ന മലയാളി നഴ്സിംഗ് വിദ്യാർത്ഥികൾ മൈസൂരുവിൽ നേരിടുന്നത് സമാനതകളില്ലാത്ത ദുരിതം. നഗരത്തിലെ അഞ്ച് പ്രമുഖ നഴ്സിംഗ് കോളേജുകളിലെ വിദ്യാർത്ഥികൾക്ക് നൽകുന്നത് അങ്ങേയറ്റം വൃത്തിഹീനമായ ഭക്ഷണമാണെന്ന ഞെട്ടിപ്പിക്കുന്ന പരാതിയാണ് ഇപ്പോൾ പുറത്തുവരുന്നത്. കോഴിക്കറിയിൽ കോഴിയുടെ തൂവലും ചോരയും പറ്റിയിരിക്കുന്ന നിലയിലാണ് വിദ്യാർത്ഥികൾക്ക് വിളമ്പുന്നത്. ഇതിന് പുറമെ ചോറിൽ നിന്ന് പാറ്റയെയും ചപ്പാത്തിയിൽ നിന്ന് പ്ലാസ്റ്റിക് അവശിഷ്ടങ്ങളും പതിവായി ലഭിക്കാറുണ്ടെന്ന് വിദ്യാർത്ഥികൾ ആക്ഷേപം ഉന്നയിക്കുന്നു. മെസ്സ് ഫീസായി പ്രതിവർഷം 80,000 രൂപ വീതം ഓരോ വിദ്യാർത്ഥിയിൽ നിന്നും ഈടാക്കുമ്പോഴാണ് ഈ കൊടുംക്രൂരത അരങ്ങേറുന്നത്. ‘ഗ്ലോബൽ എഡ്യൂക്കേഷൻ സർവീസ്’ എന്ന ഏജൻസിയാണ് ഈ അഞ്ച് കോളേജുകളിലേക്കും കോമൺ മെസ്സിൽ നിന്ന് ഭക്ഷണം എത്തിച്ചുനൽകുന്നത്.
ഭക്ഷണത്തിലെ അപാകതകൾ മൂലം വിദ്യാർത്ഥികൾക്ക് ഭക്ഷ്യവിഷബാധ ഏൽക്കുന്നത് ഇവിടെ നിത്യസംഭവമായി മാറിയിരിക്കുകയാണ്. ഭക്ഷണം പാകം ചെയ്യുന്ന അന്തരീക്ഷം അതിദയനീയമാണെന്ന് വിദ്യാർത്ഥികൾ പകർത്തിയ ദൃശ്യങ്ങൾ വ്യക്തമാക്കുന്നു. പുറത്തുനിന്ന് ഭക്ഷണം വാങ്ങി കഴിക്കാൻ ഹോസ്റ്റൽ അധികൃതർ വിദ്യാർത്ഥികളെ അനുവദിക്കാറില്ല. വൃത്തിഹീനമായ ഭക്ഷണത്തെക്കുറിച്ച് ചോദ്യം ചെയ്താൽ കടുത്ത ശിക്ഷാനടപടികളാണ് വിദ്യാർത്ഥികളെ കാത്തിരിക്കുന്നത്. ഇന്റേണൽ മാർക്ക് വെട്ടിക്കുറയ്ക്കുമെന്നും കോഴ്സ് കഴിഞ്ഞാൽ സർട്ടിഫിക്കറ്റുകൾ നൽകില്ലെന്നും പറഞ്ഞ് മാനേജ്‌മെന്റുകൾ വിദ്യാർത്ഥികളെ ഭീഷണിപ്പെടുത്തുകയാണ്. കോളേജ് അധികൃതരും ഭക്ഷണ വിതരണം നടത്തുന്ന ഏജൻസിയും തമ്മിലുള്ള അവിശുദ്ധ കൂട്ടുകെട്ടാണ് വിദ്യാർത്ഥികളുടെ ജീവിതം നരകതുല്യമാക്കുന്നത്. വിദ്യാർത്ഥികളെ കോളേജുകളിൽ എത്തിച്ചു നൽകുന്നതിന് പ്രതിഫലമായിട്ടാണ് ഈ ഏജൻസിക്ക് ഭക്ഷണ വിതരണത്തിനുള്ള കരാർ നൽകിയിരിക്കുന്നത്.
ഭക്ഷണം വിതരണം ചെയ്യുന്ന ഏജൻസി നടത്തുന്നത് മലയാളികളാണെന്നത് സംഭവത്തിന്റെ ഗൗരവം വർധിപ്പിക്കുന്നു. സ്വന്തം നാട്ടിൽ നിന്നെത്തുന്ന വിദ്യാർത്ഥികളെ ചൂഷണം ചെയ്യുന്ന നിലപാടാണ് ഇവർ സ്വീകരിക്കുന്നത്. പലതവണ പരാതിപ്പെട്ടിട്ടും യാതൊരു മാറ്റവും ഉണ്ടായിട്ടില്ലെന്നും അധികൃതർ കണ്ണടയ്ക്കുകയാണെന്നും വിദ്യാർത്ഥികൾ പറയുന്നു. ഭീഷണി ഭയന്ന് പലരും പ്രതികരിക്കാൻ മടിക്കുമ്പോഴാണ് ഒരു വിഭാഗം വിദ്യാർത്ഥികൾ തങ്ങൾ നേരിടുന്ന ദുരവസ്ഥ ദൃശ്യങ്ങൾ സഹിതം പുറംലോകത്തെ അറിയിച്ചിരിക്കുന്നത്. ഈ സാഹചര്യത്തിൽ കേരള സർക്കാർ ഇടപെടണമെന്നും വിദ്യാർത്ഥികളുടെ സുരക്ഷയും ആരോഗ്യവും ഉറപ്പാക്കാൻ നടപടി വേണമെന്നുമാണ് രക്ഷിതാക്കളുടെ ആവശ്യം. വരും ദിവസങ്ങളിൽ ഈ വിഷയത്തിൽ ശക്തമായ പ്രതിഷേധം ഉയർത്താനാണ് വിദ്യാർത്ഥികളുടെയും രക്ഷിതാക്കളുടെയും തീരുമാനം.
